جموں و کشمیر: ڈوڈہ میں دردناک حادثہ، فوجی گاڑی کھائی میں گرنے سے 10 جوان شہید، 11 دیگر زخمی

جموں و کشمیر کے ڈوڈہ میں ایک خوفناک حادثہ پیش آیا ہے، جس میں کم از کم 10 جوان شہید ہو گئے ہیں۔ میڈیا رپورٹس کے مطابق علاقہ سے گزرتے ہوئے فوج کی ’کیسپر‘ گہری کھائی میں گر گئی، جس کی وجہ سے 4 جوانوں کی شہادت دیکھنے کو ملی، حالانکہ اب شہید جوانوں کی تعداد بڑھ کر 10 ہو گئی ہے۔ اس حادثہ میں 11 دیگر جوان زخمی بھی ہوئے ہیں، جنھیں فوری طور پر علاج کے لیے اسپتال میں داخل کرایا گیا ہے۔ فوج کا یہ کیسپر ڈوڈہ میں بھدرواہ چمبا روڈ سے گزر رہا تھا، جس کی حالت پہلے سے ہی کافی خستہ بتائی جا رہی ہے۔

موصولہ خبروں میں بتایا جا رہا ہے کہ کیسپر تقریباً 400 فیٹ گہری کھائی میں گر گئی، جس کی خبر ملتے ہی فوری طور پر راحت رسانی کا عمل شروع کر دیا گیا۔ ایک افسر نے بتایا کہ نامعلوم اسباب سے گاڑی سڑک سے پھسل گئی۔ حادثہ کے بعد بچاؤ و راحتی ٹیموں کو جائے وقوع پر بھیجا گیا۔ زخمی فوجیوں کو کھائی سے نکال کر قریبی میڈیکل سنٹرل میں لے جایا گیا، جہاں 3 فوجیوں کی حالت سنگین بتائی جا رہی ہے۔

فوج کی جو گاڑی کھائی میں گری ہے، اس میں تقریباً 2 درجن جوان سوار تھے، جو ایک اونچی پہاڑی پوسٹ کی طرف جا رہے تھے۔ غالباً کسی وجہ سے ڈرائیور نے گاڑی پر اپنا کنٹرول گنوا دیا اور وہ سڑک سے پھسل کر کھائی میں جا گری۔ غور کرنے والی بات یہ ہے کہ جموں و کشمیر کے ڈوڈہ ضلع میں سیکورٹی کی صورت حال موجودہ وقت میں حساس ہے۔ یہاں حالیہ دنوں میں دہشت گردانہ سرگرمیوں اور سیکورٹی فورسز کے آپریشن بڑھے ہوئے ہیں۔ ڈوڈہ ضلع میں دہشت گردوں کی موجودگی کا اندیشہ بھی بنا ہوا ہے، خصوصاً پہاڑی اور جنگلی علاقوں میں۔ خفیہ رپورٹس کے مطابق ڈوڈہ اور کشتواڑ میں 30 سے 35 پاکستانی نژاد دہشت گرد فعال ہو سکتے ہیں، جو جنگل میں چھپے ہوئے ہیں۔