اتراکھنڈ کے وزیر اعلیٰ تیرتھ سنگھ کے بیان پر تنازعہ، ’خواتین کو پھٹی ہوئی جینز میں دیکھ کر حیرانی ہوتی ہے‘

دہرادون: اتراکھنڈ کے نئے وزیر اعلیٰ تیرتھ سنگھ راوت خواتین کے لباس پر تبصرہ کر کے تنازعہ میں پھنس گئے ہیں۔ انہوں نے کہا کہ خواتین کو پھٹی ہوئی جینز میں دیکھ کر حیرانی ہوتی ہے، ان کے دل میں یہ خیال آتا ہے کہ اس سے سماج میں کیا پیغام جائے گا۔

تیرتھ سنگھ راوت نے کہا، ’’میں جے پور میں ایک تقریب میں شریک ہونے کے لئے جارہا تھا اور جب میں جہاز میں بیٹھا تو میرے بغل میں ایک بہن جی بیٹھی تھیں۔ میں نے جب ان کی طرف دیکھا تو نیچے بوٹ تھے اور جب اس سے اوپر نگاہ ڈالی تو گھٹنے پھٹے ہوئے تھے۔ ہاتھ دیکھا تو کڑے پہنے ہوئے تھی۔ ان کے ساتھ دو بچے بھی تھے۔ میں نے پوچھا تو اس خاتون نے بتایا کہ وہ این جی او چلاتی ہیں۔ میں نے کہا کہ سماج کے درمیان گھٹنے پھٹے دکھتے ہیں، بچے ساتھ میں ہیں، بھلا یہ کیا تہذیب ہے؟‘‘

انہوں نے کہا کہ ایک طرف جہاں مغربی ممالک ہندوستان کے یوگا اور اپنے بدن کو ڈھانپنے کی روایات کی طرف دیکھتے ہیں، وہیں ہم عریانیت کے پیچھے بھاگتے ہیں۔ انہوں نے کہا، ’’گھٹنے دکھانا، پھٹی ہوئی ڈینم جینس پہننا اور امیروں کی طرح نظر آنا، یہ تمام باتیں بچوں کو سکھائی جا رہی ہیں۔ ہمارے ٹیچروں کی کیا غلطی ہے جب گھروں میں ہی بچوں کو یہ سب سکھایا جا رہا ہے؟ میں پھٹی ہوئی جینز، گھٹنا دکھا رہے اپنے بچوں کو کہاں لے کر جا رہے ہیں؟ لڑکیاں بھی کم نہیں ہیں، گھٹنا دکھا رہی ہیں، کیا یہ اچھی بات ہے؟’’

اتراکھنڈ کے نئے وزیر اعلیٰ تیرتھ سنگھ راوت کے اس بیان پر کانگریس نے سوال اٹھائے ہیں اور بی جے پی سے وضاحت طلب کی ہے۔ کانگریس لیڈر سنجے جھا نے ایک ٹوئٹ کر کے اسے شرمناک قرار دیا ہے اور بی جے پی سے پوچھا ہے کہ اس کا اس بیان پر کیا کہنا ہے! انہوں کہا کہ ’’تفرقہ آمیز سیاست کر کے سماج کو توڑنا تو ٹھیک ہے، لیکن پھٹی جینز سے ہماری عظیم روایات تباہ ہو رہی ہے، کیا بات ہے!‘‘

تیرتھ سنگھ راوت اس سے قبل وزیر اعظم نریندر مودی کا موازنہ رام اور کرشن سے کر کے تنازعہ کھڑا کر چکے ہیں۔ انہوں نے کہا کہ جس طرح سے دور قدیم میں بھگوان رام اور کرشن کو لوگ ان کے کاموں کے سبب بھگوان ماننے لگے تھے اسی طرح سے ایک دن وزیر اعظم نریندر مودی کو بھی آنے والے وقت میں لوگ رام اور کرشن کی طرح ماننے لگیں گے!

تیرتھ سنگھ نے مزید کہا، ’’وزیر اعظم مودی ایک کرشمائی ہستی ہیں۔ انہوں نے اپنے کاموں سے سبھی کو متاثر کیا ہے۔ پہلے ہندوستان کے قومی سربراہان کو دنیا میں کوئی خاص توجہ حاصل نہیں ہوتی تھی، مگر آج دنیا بھر کے بڑے سے بڑے لیڈران وزیر اعلیٰ مودی کے ساتھ تصویریں اتروانے کے لئے مائل رہتے ہیں۔‘‘