’کیا ہماری ریلوے واقعی اکیسویں صدی کے لیے تیار ہے؟‘ راہل گاندھی نے شیئر کی ریل کوچ فیکٹری افسران سے ملاقات کی ویڈیو

لوک سبھا میں حزب اختلاف کے قائد اور رائے بریلی سے کانگریس رکن پارلیمنٹ راہل گاندھی نے 21 فروری کو رائے بریلی واقع ماڈرن ریل کوچ فیکٹری کا دورہ کیا تھا۔ اس دوران انھوں نے فیکٹری افسران اور ملازمین سے ملاقات کی تھی۔ ریلوے کے جنرل منیجر کے ساتھ ان کی میٹنگ تقریباً ساڑھے تین گھنٹے تک چلی تھی۔ آج راہل گاندھی نے اس ملاقات کی ایک مختصر ویڈیو اپنے سوشل میڈیا پلیٹ فارم ’ایکس‘ پر شیئر کی ہے۔ ساتھ ہی انھوں نے یہ سوال اٹھایا ہے کہ کیا ہماری ریلوے واقعی اکیسویں صدی کے لیے تیار ہے؟

اپنے پوسٹ میں راہل گاندھی نے لکھا ہے کہ ’’کل رائے بریلی میں ماڈرن کوچ فیکٹری کے افسران اور ملازمین کے ساتھ بات چیت کے دوران ایک اہم سوال اٹھا، کیا کروڑوں ہندوستانیوں کی یاترا کی ریڑھ ہماری ریلوے واقعی 21ویں صدی کے لیے تیار ہے؟‘‘ وہ آگے لکھتے ہیں کہ ’’موجودہ وقت کی ضرورتوں کو دیکھتے ہوئے اسے مزید جدید، محفوظ اور اہل بنانے کے لیے تیزی سے کوششیں کی جانی چاہئیں۔ ریلوے کو صرف سفر کا وسیلہ نہ مان کر پروڈکشن اور معیشت کے ایک مضبوط ستون کی شکل میں تیار کرنا ہوگا۔‘‘

راہل گاندھی نے اس سوشل میڈیا پوسٹ میں یہ بھی لکھا ہے کہ ’’بیرون ملکی مشینوں، مینوفیکچرنگ اور اینوویشن پر منحصر ہونے کی جگہ ہمارا ہدف پوری طرح سے مقامی پروڈکشن سسٹم کو مضبوط بنانے پر ہونا چاہیے۔‘‘ ساتھ ہی وہ لکھتے ہیں کہ ’’ہمارے انجینئرس اور ٹیکنیشین رات دن محنت کرتے ہیں۔ اگر ان کی محنت کو صحیح سمت دی جائے اور وقت کی طلب کے مطابق سخت قدم اٹھائے جائیں تو ریلوے نہ صرف ٹرانسپورٹیشن میں بلکہ ہماری معیشت کو مضبوطی دینے میں بھی اہم کردار نبھا سکتا ہے۔‘‘