’کھڑگے کے خلاف توہین آمیز زبان پوری اپوزیشن کی توہین‘، انڈین یوتھ کانگریس کا ہیمنت بسوا سرما کے خلاف شدید احتجاج

نئی دہلی: انڈین یوتھ کانگریس نے آسام کے وزیر اعلی ہیمنت بسوا سرما کے خلاف آج راجدھانی دہلی میں شدید احتجاجی مظاہرہ کیا۔ انڈین یوتھ کانگریس کے قومی صدر ادے بھانو چِب کی قیادت میں ہونے والے اس احتجاج میں کارکنان نے بڑی تعداد نے شرکت کی۔ رائے سینا روڈ سے شروع ہونے والا احتجاجی مارچ جنتر منتر تک پہنچا، جہاں کارکنان نے احتجاجی نعروں والی تختیاں ہاتھوں میں اٹھا رکھی تھی۔ کارکنان نے مرکزی اور آسام حکومتوں کے خلاف فلک شگاف نعرے لگائے اور جمہوری اقدار کے تحفظ کا مطالبہ کیا۔

احتجاج کے دوران ادے بھانو چِب نے آسام کے وزیر اعلیٰ پر سخت حملہ کرتے ہوئے کہا کہ ہیمنت بسوا سرما گھبراہٹ کا شکار ہیں اور خوف پیدا کرنے کی کوشش میں کانگریس لیڈران کو دھمکا رہے ہیں۔ انہوں نے کہا کہ کانگریس پارٹی کے لیڈران محب وطن ہیں اور کسی دباؤ کے سامنے نہیں جھکیں گے۔ ادے بھانو چِب نے الزام لگایا کہ جب ملک کے وسائل کی ’چوری‘ کرنے والوں کے بارے میں سچائی سامنے آتی ہے تو بی جے پی لیڈر خوف کا مظاہرہ کر تے ہیں۔ کانگریس لیڈران اس طرح کے مسائل کو اٹھاتے رہیں گے اور عوام کے سامنے سچائی لائیں گے۔

ادے بھانو چِب نے ہیمنت بسوا سرما کی زبان و بیان پر سخت اعتراض کیا۔ انہوں نے کہا کہ ایسی ’ٹپوری زبان‘ ایک وزیر اعلیٰ کو زیب نہیں دیتی اور انہیں اپنے بیان پر شرم آنی چاہیے۔ چِب نے الزام لگایا کہ ہیمنت بسوا سرما نے کانگریس صدر ملکارجن کھڑگے کے خلاف توہین آمیز زبان استعمال کی، جو نہ صرف ذاتی حملہ ہے بلکہ پوری اپوزیشن کی توہین ہے۔

احتجاج کے دوران چِب نے بی جے پی پر دلت مخالف ذہنیت رکھنے کا بھی الزام لگایا۔ انہوں نے کہا کہ بی جے پی کی ذہنیت ہمیشہ سے دلت مخالف رہی ہے، اور یہ اس کے لیڈروں کی زبان اور طرز عمل سے صاف نظر آتا ہے۔ انہوں نے کہا کہ اس طرح کی بیان بازی سے صاف ظاہر ہوتا ہے کہ بی جے پی سماج کے ایک بڑے طبقہ کے خلاف نفرت کو ہوا دیتی ہے، جسے کانگریس پارٹی برداشت نہیں کرے گی۔

اس احتجاجی مظاہرہ کے دوران انڈین یوتھ کانگریس کے لیڈران نے کہا کہ یہ احتجاج صرف آغاز ہے اور اگر اس طرح کی بیان بازی اور کارروائیاں جاری رہیں تو مستقبل میں بڑے پیمانے پر تحریک شروع کی جائے گی۔ انھوں نے واضح لفظوں میں کہا کہ وہ اس معاملے میں قطعی پیچھے نہیں ہٹیں گے۔ جمہوریت، آئین اور سماجی انصاف کے تحفظ کی جدوجہد جاری رہے گی۔ کانگریس پارٹی کسی دباؤ یا دھمکی کے سامنے جھکنے والی نہیں ہے، اور وہ ہمیشہ عوامی مسائل کو اٹھاتی رہے گی۔