ہماچل میں کانگریس کی حکومت بنی تو کابینہ کے پہلے اجلاس میں ایک لاکھ ملازمتوں پر مہر ثبت ہوگی، پرینکا گاندھی کا وعدہ

شملہ: کانگریس جنرل سکریٹری پرینکا گاندھی نے ہماچل پردیش میں ایک انتخابی جلسہ سے خطاب کرتے ہوئے کئی اعلانات کئے۔ لوگوں سے خطاب کرتے ہوئے انہوں نے کہا کہ اگر ہماچل پردیش میں کانگریس پارٹی کی حکومت بنتی ہے تو کابینہ کی پہلی میٹنگ میں ایک لاکھ سرکاری عہدے پر کرنے کی منظوری دی جائے گی۔ اس کے ساتھ انہوں نے یہ بھی کہا کہ پرانی پنشن اسکیم کو بحال کیا جائے گا۔

ہماچل پردیش کے سولن میں کانگریس کی انتخابی مہم کا آغاز کرتے ہوئے پرینکا گاندھی نے کہا کہ کل 5 لاکھ لوگوں کو روزگار دیا جائے گا، جن میں سے ایک لاکھ نوکریوں کا فیصلہ کابینہ کی پہلی میٹنگ میں ہی کر دیا جائے گا۔ کابینہ کے اجلاس میں پرانی پنشن بحالی پر بھی فیصلہ کیا جائے گا۔ انہوں نے کہا کہ ریاست میں 2 لاکھ ملازمین کو ان کی واجبات ادا کی جائیں گی۔ ہماچل پردیش میں کانگریس کی ’پریورتن پرتیگیا ریلی‘ کے دوران پرینکا گاندھی نے ہماچل پردیش کی تشکیل کے دوران اندرا گاندھی کے تعاون کو بھی یاد دلایا۔ انہوں نے کہا کہ ان کا ہماچل پردیش کے ساتھ روحانی اور دل کا رشتہ رہا ہے۔

بی جے پی حکومت پر حملہ کرتے ہوئے پرینکا گاندھی نے کہا کہ ملازمین پنشن کا مطالبہ کرتے ہوئے دھرنے پر بیٹھے ہیں لیکن بی جے پی حکومت نے پنشن منسوخ کر دی۔ دلیل یہ دی جاتی ہے کہ ملازمین کے لئے پیسے نہیں ہیں، جبکہ صنعتکاروں کے قرضے معاف کر دیے گئے ہیں۔ انہوں نے کہا کہ نوجوان بے روزگار ہیں، پانچ سالوں میں ہزاروں سرکاری آسامیاں خالی ہیں۔ انہوں نے کہا کہ فصلوں اور پھلوں کی قیمتیں تک بڑے صنعتکار طے کرتے ہیں۔

دریں اثنا، پرینکا گاندھی نے اگنی ویر اسکیم کے حوالہ سے بھی مرکزی حکومت پر حملہ بولا۔ انہوں نے کہا کہ جو نوجوان ملک کے لئے شہید ہونے کو تیار ہیں حکومت انہیں ٹھیکے پر رکھے گی۔ انہوں نے کورونا کے دور میں پی پی ای کٹس میں گھپلے کا بھی الزام عائد کیا۔ انہوں نے واضح طور پر کہا کہ کورونا کے دوران ایک گھوٹالہ ہوا ہے۔ مہنگائی پر حکومت کو ہدف تنقید بناتے ہوئے پرینکا نے کہا کہ ایک ہزار روپے کا سلنڈر مل رہا ہے۔ اتنا مہنگا سلنڈر کون خریدے گا؟