’2027 کے اسمبلی انتخاب میں شکست ملی تو سماجوادی پارٹی چنبل چلی جائے گی‘، اکھلیش یادو کا اعلان

سماجوادی پارٹی کے سربراہ اکھلیش یادو اتر پردیش میں اسمبلی انتخاب کے پیش نظر پوری طرح سرگرم دکھائی دے رہے ہیں۔ آئندہ سال ہونے والے انتخاب کی تیاریاں زور و شور سے چل رہی ہیں اور اکھلیش بی جے پی کو تنقید کا نشانہ بنانے کا کوئی بھی موقع ضائع نہیں کر رہے ہیں۔ ایک تازہ بیان میں انھوں نے بی جے پی کو ہدف تنقید بناتے ہوئے کہا ہے کہ ’’اتر پردیش کا انتخاب اس بار آخری انتخاب ہوگا۔ اگر ہماری پارٹی 2027 میں ہونے والا انتخاب ہار جاتی ہے تو پوری سماجوادی پارٹی چنبل چلی جائے گی۔‘‘

اکھلیش یادو کا کہنا ہے کہ موجودہ وقت میں انتخابی ایجنسیوں کا غلط استعمال بہت بڑی سطح پر کیا جا رہا ہے۔ بی جے پی پر طنز کستے ہوئے انھوں نے کہا کہ ’’ڈالر جتنا اوپر جائے گا، روپیہ اتنا ہی نیچے آئے گا، جس سے چائے مزید مہنگی ہو جائے گی۔‘‘ انھوں نے اسمارٹ میٹر کا ذکر کرتے ہوئے کہا کہ ’’اسمارٹ سٹی مین اسمارٹ میٹر لگائے گئے تھے، جسے اکھاڑ پھینک دیا گیا ہے۔ بی جے پی کے وزیر بے ایمانی کر رہے ہیں، جس کی وجہ سے ان کا محکمہ وزیر اعلیٰ یوگی کے ذریعہ چھین لیا گیا اور انھیں ہاف کر دیا گیا ہے۔‘‘ وہ یہ بھی کہتے ہیں کہ ’’میں آپ کو یقین دلاتا ہوں کہ آنے والے وقت میں کئی بی جے پی اراکین اسمبلی کے ٹکٹ بھی صاف ہو جائیں گے۔‘‘

اکھلیش یادو نے اپنی بات کو آگے بڑھاتے ہوئے کہا کہ آپ نے مغربی بنگال میں دیکھا ہوگا کس طرح ممتا دیدی پر مقدمہ درج کرایا گیا تھا۔ جب سے ملک میں بی جے پی کی حکومت بنی ہے، تب سے مقبول وزرائے اعلیٰ پر سنگین دفعات لگا کر ان پر ایف آئی آر درج کر انھیں پریشان کیا جا رہا ہے، جو جمہوریت کے لیے خطرناک ہے۔ اکھلیش کہتے ہیں کہ ’’میں نے راہل گاندھی کے ساتھ انڈیا بلاک کو لے کر ہوئی ایک میٹنگ میں کہا تھا کہ ٹی ایم سی میں کئی لوگ میرے اچھے دوست ہیں اور مجھے پورا بھروسہ تھا کہ ان کی بڑی جیت ہونے جا رہی ہے۔‘‘ ان کا اشارہ انتخاب میں ہوئی دھاندلی کی طرف تھا۔

انڈیا بلاک کے بارے میں اکھلیش یادو کا کہنا ہے کہ ’’انڈیا بلاک سے متعلق میں کسی طرح کی بحث نہیں چاہتا، کیونکہ حقیقت یہی ہے کہ انڈیا بلاک متحد رہے تبھی بی جے پی کو شکست دی جا سکتی ہے۔ بی جے پی 403 سیٹوں پر تیاری کر رہی ہے اور ہم بھی 403 سیٹوں پر تیاری کر رہے ہیں۔ اس کا مطلب انڈیا بلاک ڈبل تیاری کر رہی ہے۔‘‘