’بی جے پی اور الیکشن کمیشن کی سازش کو بے نقاب کروں گی‘، ممتا بنرجی نے ایس آئی آر کے خلاف شروع کیا دھرنا

مغربی بنگال کی وزیر اعلیٰ ممتا بنرجی نے جمعہ کے روز ووٹر لسٹ سے مبینہ طور پر بڑی تعداد میں ووٹرس کا نام حذف کیے جانے کے خلاف احتجاجی مظاہرہ شروع کر دیا۔ اس قدم سے ترنمول کانگریس اور الیکشن کمیشن کے درمیان تصادم مزید بڑھ گیا ہے۔ کولکاتا کے اسپلینیڈ میٹرو چینل پر دھرنا شروع کرتے ہوئے ممتا بنرجی نے بی جے پی اور الیکشن کمیشن پر بنگالی ووٹرس کو حق رائے دہی سے محروم کرنے کی سازش تیار کرنے کا الزام عائد کیا۔ اس دوران انھوں نے قسم بھی کھائی کہ وہ بی جے پی اور الیکشن کمیشن کو بے نقاب کریں گی۔

ترنمول کانگریس چیف نے احتجاجی مظاہرہ کی ابتدا کرتے ہوئے کہا کہ ’’میں بنگالی ووٹرس کو حق رائے دہی سے محروم کرنے کی بی جے پی و الیکشن کمیشن کی سازش کو بے نقاب کروں گی۔‘‘ انھوں نے اسٹیج سے الزام عائد کیا کہ ترمیم شدہ ووٹر لسٹ میں کئی ووٹرس کو مردہ قرار دیا گیا ہے، جسے کسی بھی حال میں قبول نہیں کیا جا سکتا۔ وہ کہتی ہیں کہ ’’میں ان ووٹرس کو، جنھیں الیکشن کمیشن نے مردہ قرار دیا ہے، اس احتجاجی مظاہرہ والی جگہ پر لا کر کھڑا کروں گی۔‘‘

یہ دھرنا و مظاہرہ وسطی کولکاتا میں دوپہر 2.15 بجے شروع ہوا۔ اس کا اعلان ترنمول کانگریس کے قومی جنرل سکریٹری ابھشیک بنرجی نے پہلے ہی کر دیا تھا۔ انھوں نے الیکشن کمیشن پر سیاسی طور سے متاثر ہو کر کام کرنے کا الزام عائد کیا تھا اور کہا تھا کہ اس سے لاکھوں اہل ووٹرس حق رائے دہی سے محروم ہو سکتے ہیں۔

قابل ذکر ہے کہ تنازعہ الیکشن کمیشن کی نئی ووٹر لسٹ سامنے آنے کے بعد بڑھا ہے۔ سرکاری اعداد و شمار کے مطابق گزشتہ سال نومبر میں ایس آئی آر شروع ہونے کے بعد سے 63.66 لاکھ ووٹرس کے نام لسٹ سے ہٹا دیے گئے ہیں۔ یہ مجموعی ووٹرس کا تقریباً 8.3 فیصد ہیں۔ اس کی وجہ سے بنگال میں ووٹرس کی تعداد 7.66 کروڑ سے گھٹ کر 7.04 کروڑ رہ گئی۔ اس کے علاوہ 60.06 لاکھ سے زیادہ ووٹرس کو جانچ کے دائرے میں رکھا گیا ہے۔ اس کا مطلب ہے کہ آنے والے ہفتوں میں قانونی جانچ کے ذریعہ سے ان کی اہلیت مقرر کی جائے گی۔