بلند شہر میں خوفناک سڑک حادثہ، کنٹینر نے ٹریکٹر کو ماری ٹکر، 8 عقیدت مندوں کی موت، 50 زخمی

اتر پردیش کے بلند شہر کے کھرجا میں خوفناک سڑک حادثہ پیش آیا ہے۔ قومی شاہراہ 34 پر ارنیا علاقے کے گھٹال گاؤں کے قریب عقیدت مندوں سے بھری ٹریکٹر ٹرالی کو کنٹینر نے پیچھے سے زوردار ٹکر مار دی جس سے 8 لوگوں کی موت ہو گئی جبکہ تقریباً 50 افراد زخمی ہو گئے۔ حادثے کے بعد ڈی ایم شروتی اور ایس ایس پی دنیش کمار نے موقع پر پہنچ کر زخمیوں کے احوال دریافت کیے۔

موصولہ اطلاع کے مطابق بلند شہر کے ارنیا تھانہ علاقے واقع گھٹال گاؤں کے پاس اتوار کی دیر رات تیز رفتار کنٹینر نے ٹریکٹر ٹرالی میں پیچھے سے ٹکر مار دی۔ ٹکر اتنی زور دار تھی کہ ٹرالی پر سوار سبھی عقیدت مند اِدھر اُدھر جا گرے۔ حادثے کی اطلاع ملتے ہی پولیس موقع پر پہنچی اور راحت و بچاؤ کام شروع کیا۔

پولیس گاڑی، ایمبولنس اور راہگیروں کی مدد سے زخمیوں کو اسپتال میں بھرتی کرایا گیا۔ کیلاش اسپتال میں 29، مُنی سی ایچ سی میں 18 جبکہ 10 افراد کو جٹیا اسپتال میں داخل کرایا گیا۔ اس میں کیلاش اسپتال میں ڈاکٹروں نے دو بچے سمیت 6 لوگوں اور مُنی سی ایچ سی میں 2 لوگوں کو مردہ قرار دیا گیا۔ مہلوکین کی شناخت چاندنی (12)، رام بیٹی (62)، ای پی بابو (50)، دھنی رام (40)، موشری، شیوانش (6) کے طور پر ہوئی ہے۔

بتایا جاتا ہے ٹریکٹر ٹرالی پر سوار سبھی لوگ کاسگنج سے راجستھان کے گوگامیڑی جا رہے تھے۔ بلند شہر کے ایس ایس پی دنیش کمار سنگھ کے مطابق ٹریکٹر میں 50 سے 60 عقیدت مند سوار تھے۔ یہ لوگ جاہرویر (گوگا جی) کے درشن کے لیے راجستھان کے گوگا میڑی جا رہے تھے۔

دنیش کمار سنگھ نے بتایا کہ حادثہ رات قریب 2.15 بجے علی گڑھ بارڈر این ایچ 34 پر ہوا۔ کنٹینر کی ٹکر سے ٹریکٹر اُلٹ گیا جس میں بڑی تعداد میں لوگ زخمی ہو گئے۔ 8 لوگوں کی جان چلی گئی۔ 45 لوگوں کا علاج ابھی جاری ہے جن میں سے 3 کی حالت نازک ہے۔ جائے حادثہ پر ایس پی (دیہی)، ایس پی (جرائم) شنکر پرساد، اے ڈی ایم پرمود کمار پانڈے، ایس ڈی ایم پرتیکشا پانڈے، سی او پورنیما سنگھ سمیت 4 مقامات پر پولیس دستہ موجود رہا۔