ہولی کا تہوار ہندوستان کی گنگا جمنا تہذیب کی علامت: محبوبہ مفتی

سری نگر: پیپلز ڈیموکریٹک پارٹی (پی ڈی پی) کی صدر اور سابق وزیر اعلیٰ محبوبہ مفتی نے ہولی کے موقع پر لوگوں کو مبارکباد دیتے ہوئے کہا ہے کہ یہ تہوار ہندوستان کی گنگا جمنا تہذیب کی علامت رہا ہے۔ تاہم، انہوں نے افسوس کا اظہار کیا کہ کچھ متعصب عناصر نے اس جشن کو اقلیتوں کے لیے خوف کا باعث بنا دیا ہے۔

محبوبہ مفتی نے جمعہ کے روز سماجی رابطے کی ویب سائٹ 'ایکس' پر اپنے ایک پوسٹ میں لکھا، ’’ہولی کا تہوار میرے لئے ہمیشہ ہندوستان کی گنگا جمنا تہذیب کی علامت رہا ہے۔ مجھے یاد ہے کہ میں یہ تہوار اپنے ہندو دوستوں کے ساتھ بے پناہ خوشی اور جوش و خروش سے منانے کے لیے بے صبری سے انتظار کرتی تھی۔‘‘

انہوں نے کہا کہ اس تہوار کا اصل پیغام بھائی چارہ اور خوشی کا ہے لیکن موجودہ دور میں کچھ طاقتیں سماجی ہم آہنگی کو نقصان پہنچا رہی ہیں۔ ان کے بقول، "بدقسمتی سے، اب کچھ متعصب لوگوں نے اقتدار میں رہنے والوں کی منظوری سے اس جشن کو اقلیتوں کے لیے خوف کا باعث بنا دیا ہے۔"

محبوبہ مفتی نے مزید کہا کہ ہندوستان کو اپنی تکثیریت اور روایات کو بچانے کے لیے بیدار ہونا پڑے گا۔ انہوں نے اپنے پیغام میں لکھا، ’’یہ بھارت کے جاگنے کا وقت ہے، سب کو ہولی کی مبارکباد۔‘‘