کچھ ریاستوں میں 20 سے 22 ستمبر تک ہوگی موسلادھار بارش، محکمہ موسمیات نے جاری کیا الرٹ

ہندوستان کی کچھ ریاستوں میں ابھی تک مانسون کی بارش ہو رہی ہے۔ کچھ ریاستوں میں تو لینڈسلائیڈ اور بادل پھٹنے کے واقعات نے تباہی کا عالم پیدا کر رکھا ہے۔ اس درمیان آئی ایم ڈی (محکمہ موسمیات) نے راجدھانی دہلی میں جمعہ کے روز بادل چھائے رہنے کے ساتھ ہلکی بارش کے امکانات ظاہر کیے ہیں۔ دہلی میں کم از کم درجہ حرارت آج 24.6 ڈگری سلسیس درج کیا گیا، جبکہ زائد از زائد درجہ حرارت 34 ڈگری کے آس پاس رہنے کا امکان ہے۔ خاص بات یہ ہے کہ 20 سے 29 ستمبر تک بارش کا امکان بالکل بھی نہیں ہے، یعنی موسم کھلا ہوا رہنے کی امید ظاہر کی گئی ہے۔

محکمہ موسمیات نے کچھ ریاستوں میں آئندہ ہفتہ موسلادھار بارش کی پیشین گوئی بھی کی ہے۔ مثلاً جھارکھنڈ، بہار، آسام اور تمل ناڈو میں موسم سہاؤنا ہو سکتا ہے۔ کچھ مقامات پر بارش کے ساتھ ساتھ تیز ہواؤں کا الرٹ بھی محکمہ موسمیات نے جاری کیا ہے۔ جھارکھنڈ کی بات کی جائے تو وہاں 20 سے 22 ستمبر تک بارش ہو سکتی ہے۔ رانچی موسمیاتی سنٹر نے اس کے لیے 5 دنوں کا یلو الرٹ جاری کیا ہے۔ اس دوران کہیں تیز بارش اور کہیں ہلکی سے درمیانہ درجہ کی بارش کے ساتھ گرج اور بجلی گرنے کا اندیشہ ہے۔

محکمہ موسمیات کے مطابق 20 ستمبر کے بعد بہار میں شدید بارش کا امکان نہیں ہے، حالانکہ بارش کا مدھم سلسلہ جاری رہے گا۔ 25 ستمبر تک بہار کے کچھ اضلاع میں ہلکی لیکن طویل مدتی بارش ہو سکتی ہے۔ فی الحال راجدھانی پٹنہ میں بارش کے آثار دکھائی نہیں دے رہے ہیں، لیکن درجہ حرارت گھٹنے سے لوگوں کو اُمس اور گرمی سے راحت ملی ہے۔

محکمہ موسمیات نے تمل ناڈو میں شدید بارش کی پیشین گوئی کی ہے۔ اس کے مطابق ریاست میں 21 ستمبر کو بھاری بارش کا امکان ہے۔ آئندہ 5 دنوں میں جنوبی آندھرا پردیش، ینم اور رائل سیما میں 30 سے 40 کلومیٹر فی گھنٹہ کی تیز ہوائیں چل سکتے ہیں۔ آئی ایم ڈی نے بنگلورو کے لیے یلو الرٹ جاری کیا ہے۔ یہاں ہلکی سے درمیانہ درجہ کی بارش یا گرج کے ساتھ بوچھاریں پڑنے کا امکان ہے۔ وجئے پورہ، بیدر، کلبرگی، تمکورو، کولار اور چکبلاپورہ بھی یلو الرٹ کے دائرے میں ہیں۔

دیگر ریاستوں کی بات کریں تو 20 ستمبر کو اروناچل پردیش میں موسلادھار بارش ہو سکتی ہے۔ علاوہ ازیں 20 سے 24 ستمبر تک آسام، میگھالیہ، ناگالینڈ، منی پور، میزورم اور تریپورہ میں تیز بارش کا امکان ہے۔ 22 ستمبر کو آسام اور میگھالیہ میں کچھ مقامات پر بہت بھاری بارش ہو سکتی ہے۔