ہریانہ کانگریس کی دہلی میں میٹنگ، ہریانہ میں زبردست احتجاج کی تیاری

کانگریس نے اعلان کیا ہے کہ پارٹی ہریانہ کے ہر ضلع میں سڑکوں پر اترے گی اور ووٹ چوری کے معاملے پر ریاستی دارالحکومت میں زبردست مظاہرہ کرے گی۔

یہ فیصلہ اتوار کو اندرا بھون میں منعقدہ ہریانہ پردیش کانگریس کی میٹنگ میں کیا گیا۔ میٹنگ میں ہریانہ پردیش کانگریس کے انچارج بی کے ہری پرساد، ریاستی کانگریس کے صدر راؤ نرند سنگھ، قانون ساز اسمبلی میں پارٹی کے لیڈر بھوپندر سنگھ ہڈا، کانگریس جنرل سکریٹری کماری سیلجا، رکن پارلیمنٹ دیپیندر سنگھ ہڈا اور دیگر سینئر رہنماؤں اور سابق ارکان اسمبلی نے شرکت کی۔

میٹنگ کے بعد دیپیندر سنگھ ہڈا نے کہا کہ الیکشن کمیشن نے بی جے پی کے ساتھ ملی بھگت سے جس طرح ہریانہ میں اتنے بڑے پیمانے پر ووٹر لسٹ کے ساتھ چھیڑ چھاڑ کی ہے اس سے ثابت ہوتا ہے کہ چیف الیکشن کمشنر بی جے پی کے چیف انچارج کے طور پر کام کر رہے ہیں۔ بی جے پی کو جب بھی کسی ریاست میں کوئی چیلنج درپیش ہوتا ہے تو وہ اس طرح کے ہتھکنڈوں کا سہارا لیتے ہیں۔

انہوں نے مزید کہا کہ ووٹ چوری صرف ہریانہ کا مسئلہ نہیں ہے بلکہ قومی مسئلہ ہے۔ انہوں نے کہاکہ "ہم جمہوریت کو بچانے کے لیے لڑیں گے، جس کے لیے ہم نے ایک تفصیلی پروگرام تیار کیا ہے۔ ہر ضلع میں احتجاج کیا جائے گا۔ ہر ضلع میں کانگریس کے کارکنان سڑکوں پر نکل کر جمہوریت کو بچانے کے لیے لڑیں گے۔"