ہریانہ کے وزیر اعلیٰ، اسمبلی اسپیکر اور دو اراکین اسمبلی کورونا کے شکار

چنڈی گڑھ: ہریانہ اسمبلی اجلاس شروع ہونے سے عین قبل ریاست کے وزیر اعلیٰ منوہر لال کھٹر، اسمبلی اسپیکر گیان چند گپتا، حکمراں بھارتیہ جنتا پارٹی (بی جے پی) کے اندری سے رکن اسمبلی رام کمار کشیپ اور رتیا سے رکن اسمبلی لکشمن ناپا کورونا کا شکار ہو گئے ہیں۔

کھٹر نے دیر شام ٹوئٹر پر خود کے کورونا سے متاثر ہو جانے کی اطلاع دی۔ انہوں نے لکھا ہے کہ انہوں نے کووڈ ٹیسٹ کرایا اور انکی رپورٹ پازیٹیو آئی ہے۔ انہوں نے گزشتہ ہفتہ ان کے رابطہ میں اپنے تمام ساتھیوں سے ٹیسٹ کروانے اور قریبی رابطوں کو کوارنٹائن ہونے کے لئے کہا ہے۔

خیال رہے کہ حکومت نے 26 اگست سے اسمبلی کا مانسون اجلاس طلب کیا ہے اس سے عین قبل ہی وزیر اعلیٰ، اسمبلی اسپیکر اور دو اراکین اسمبلی کے کوروناپازیٹیو پائے جانے سے اجلاس پر غیریقینی کے بادل منڈلا رہے ہیں۔ اجلاس مدت میں کمی بھی کی جا سکتی ہے۔ ریاستی حکومت نے اسمبلی اجلاس میں حصہ لینے والے تمام وزرا اور اراکین اسمبلی سے کورونا جانچ لازمی طور پر کرانے کو کہا ہے۔راحت کی بات یہ ہے کہ بیشتر اراکین اسمبلی کی کورونا وائرس کی رپورٹ منفی آئی ہے۔

کورونا سے بچاو کے اصولوں پر عمل کرتے ہوئے حکومت نے میڈیا کا بھی اسمبلی احاطہ میں داخلہ ممنوع کیا ہے۔ البتہ ایوان میں ہونے والی کارروائی کا ہریانہ ہاوس میں براہ راست نشریات کا انتظام کیا گیا ہے اور یہیں سے میڈیا کوریج ہوگی۔ ان کے علاوہ یہاں ایم ایل اے ہاسٹل کے مزید تین رکن اسمبلی کے نو ملازمین بھی کورونا متاثرملے ہیں۔ پنچکولہ کی ایس ڈی ایم رچا راٹھی اور ایڈیشنل پولیس کمشنر نوپور بشنوئی بھی کورونا کی زد میں آگئی ہیں۔