سونیا گاندھی کی یادداشت ’بیلانگنگ‘ اب ہندوستان میں ہارپر کولنز کرے گا شائع

نئی دہلی: کانگریس کی سینئر رہنما سونیا گاندھی کی طویل انتظار کے بعد آنے والی یادداشت ’بیلانگنگ: اے جرنی آف لو‘ اب ہندوستان میں ہارپرکولنز انڈیا شائع کرے گا۔ ناشر نے جمعہ کو اعلان کیا کہ کتاب 10 نومبر کو ہندوستان میں جاری کی جائے گی، جس کے ساتھ ہی اس کی ملکی اشاعت سے متعلق غیر یقینی صورت حال ختم ہو گئی ہے۔

ہارپر کولنز انڈیا کے مطابق بیلانگنگ موجودہ دور کی سب سے زیادہ متوقع سیاسی یادداشتوں میں سے ایک ہے۔ کتاب میں سونیا گاندھی کی ذاتی زندگی، محبت، شناخت، ذمہ داری اور ہندوستان سے وابستگی کے سفر کو بیان کیا گیا ہے، جبکہ ملک کی حالیہ سیاسی تاریخ کے اہم واقعات کا ایک اندرونی منظرنامہ بھی پیش کیا جائے گا۔

ہندوستان میں کتاب کی اشاعت کا فیصلہ ایسے وقت میں سامنے آیا ہے جب پینگوئن رینڈم ہاؤس انڈیا (پی آر ایچ آئی) نے، جو ابتدا میں اس کتاب کو شائع کرنے کا خواہش مند تھا، بعد میں اسے ہندوستان میں شائع نہ کرنے کا اعلان کیا تھا۔ اس معاملے کے بعد کتاب کے ناشر کی تبدیلی اور مسودے میں مبینہ اداریاتی تبدیلیوں کو لے کر تنازع پیدا ہوگیا تھا۔

اس دوران کانگریس کے متعدد رہنماؤں نے حکومتی دباؤ اور اظہارِ رائے کی آزادی سے متعلق سوالات اٹھائے تھے۔ بعض رہنماؤں نے الزام عائد کیا تھا کہ پینگوئن انڈیا پر کتاب کے ان حصوں کو حذف کرنے کے لیے دباؤ ڈالا گیا جن میں وزیر اعظم نریندر مودی، راشٹریہ سویم سیوک سنگھ (آر ایس ایس) اور مودی حکومت کے دور میں چین کے زیر قبضہ ہندوستان علاقے سے متعلق معاملات کا ذکر ہے۔

تاہم پینگوئن رینڈم ہاؤس انڈیا نے واضح کیا تھا کہ کتاب کی اشاعت سے پیچھے ہٹنے کے فیصلے کے پیچھے ’کسی بھی قسم کا بیرونی دباؤ’ نہیں تھا۔ ناشر نے رازداری کی شقوں اور مصنفہ کے ساتھ معاہدے کا حوالہ دیتے ہوئے اس تعطل کی اصل نوعیت کی تفصیلات بتانے سے انکار کیا تھا۔

اب ہارپر کولنز انڈیا کے اعلان کے بعد یہ یادداشت ہندوستان میں بھی اسی تاریخ کو دستیاب ہوگی جس دن اس کی بین الاقوامی اشاعت ہوگی۔ بین الاقوامی سطح پر کتاب پینگوئن رینڈم ہاؤس کے ادارے الفریڈ اے نوف کے ذریعے 10 نومبر کو جاری کی جائے گی۔

بیلانگنگ میں سونیا گاندھی کے بچپن سے لے کر ہندوستان میں ان کی زندگی تک کے سفر کو بیان کیا گیا ہے۔ کتاب کا آغاز 1965 کے کیمبرج کے زمانے سے ہوتا ہے، جہاں 19 سالہ سونیا مائنو کی ملاقات راجیو گاندھی سے ہوئی تھی۔ اس ملاقات کے بعد دونوں کے تعلق، شادی اور ہندوستان میں سونیا گاندھی کی نئی زندگی کے مختلف پہلوؤں کو یادداشت کا حصہ بنایا گیا ہے۔

کتاب میں اندرا گاندھی کے ساتھ ان کے تعلق، ہندی زبان سیکھنے کی کوششوں، ساڑھی پہننے اور ہندوستانی کھانوں، روایات اور روزمرہ زندگی سے مانوس ہونے کے تجربات بھی شامل ہیں۔

یادداشت کا ایک اہم اور انتہائی ذاتی حصہ 1991 میں تمل ناڈو میں انتخابی مہم کے دوران خودکش بم حملے میں راجیو گاندھی کے قتل سے متعلق ہے۔ سونیا گاندھی نے اس سانحے، اپنے خاندان پر اس کے اثرات اور اس کے بعد کی زندگی کے بارے میں بھی تفصیل سے بیان کیا ہے۔

ہارپرکولنز کے مطابق یہ کتاب سونیا گاندھی کے ذاتی سفر کے ساتھ ساتھ ان واقعات پر بھی روشنی ڈالے گی جنہوں نے ہندوستان کی حالیہ تاریخ اور خود ان کی زندگی کا رخ متعین کیا۔