گروگرام: گلوکار دلیر مہندی سمیت تین لوگوں کے فارم ہاؤس سیل، غیر قانونی تعمیرات کا الزام

ٹاؤن اینڈ کنٹری پلاننگ محکمہ (ڈی ٹی سی پی) نے سوہنا میں دمدما جھیل کے پاس مشہور پنجابی گلوکار دلیر مہندی کے ایک فارم ہاؤس سمیت تین لوگوں کے فارم ہاؤسز کو سیل کر دیا ہے۔ ایک افسر نے اس سلسلے میں جانکاری دیتے ہوئے بتایا کہ منگل کے روز سونیا گھوش بنام ہریانہ ریاست معاملے میں نیشنل گرین ٹریبونل (این جی ٹی) کے احکامات پر عمل میں تین فارم ہاؤسز کے خلاف سیلنگ مہم چلائی گئی تھی۔

ضلع ٹاؤن پلانر امت مدھولیا کی قیادت میں اسسٹنٹ ٹاؤن پلانر سمیت ملک، دنیش سنگھ، روہن اور شبھم نے ڈیوٹی مجسٹریٹ لچھی رام، نائب تحصیلدار، سوہنا کی موجودگی میں سیلنگ مہم چلائی۔ ٹیم کے ساتھ سوہنا صدر تھانہ کی پولیس ٹیم بھی تعینات رہی۔

ضلع ٹاؤن پلانر امت مدھولی کا کہنا ہے کہ یہ جھیل کے تالاب والے علاقہ میں اتھارٹی سے قبل اجازت کے بغیر بنائے گئے غیر قانونی فارم ہاؤس تھے۔ یہ اراولی علاقہ میں واقع تھے۔ محکمہ کے ایک افسر نے نام نہ شائع کرنے کی شرط پر اس کی تصدیق کی ہے کہ تین فارم ہاؤس میں سے ایک گلوکار دلیر مہندی کا ہے، جو تقریباً 1.5 ایکڑ کی زمین پر بنا ہے۔