1.5 لاکھ روپے سے بھی نیچے پہنچ گیا سونا، چاندی کی قیمت میں بھی گراوٹ کا سلسلہ جاری

ہندوستانی صرافہ بازار میں سونے اور چاندی کی قیمتوں میں گراوٹ کا سلسلہ جاری ہے۔ جمعرات کی صبح انڈیا بلین اینڈ جیولرز ایسوسی ایشن (آئی بی جے اے) کی سرکاری ویب سائٹ ibjarates.com پر جاری تازہ نرخوں کے مطابق آج بھی ان دھاتوں کی قیمتوں میں کمی درج کی گئی ہے، جس سے خریداروں کو کسی حد تک راحت ملنے کی امید پیدا ہوئی ہے۔

تازہ اعداد و شمار کے مطابق 24 قیراط خالص سونے کی قیمت 10 گرام کے لیے ایک لاکھ 50 ہزار روپے سے نیچے آ گئی ہے، جبکہ 999 خالصیت والی چاندی کی قیمت بھی کمی کے بعد 2 لاکھ 44 ہزار روپے فی کلوگرام سے کم کی سطح پر پہنچ گئی ہے۔ آئی بی جے اے کی جانب سے جاری نرخوں کے مطابق 916 خالصیت یعنی 22 قیراط سونے کی قیمت اب بھی ایک لاکھ 36 ہزار روپے فی 10 گرام سے زیادہ برقرار ہے، تاہم گزشتہ دنوں کے مقابلے میں اس میں بھی نرمی دیکھی گئی ہے۔

ماہرین کا کہنا ہے کہ بین الاقوامی بازاروں میں اتار چڑھاؤ اور مقامی طلب و رسد کی صورتحال سونے اور چاندی کی قیمتوں پر اثر انداز ہو رہی ہے۔ واضح رہے کہ انڈیا بلین اینڈ جیولرز ایسوسی ایشن کی جانب سے جاری کردہ نرخ پورے ملک میں معتبر اور قابل قبول سمجھے جاتے ہیں۔ یہ ادارہ مرکزی حکومت کی جانب سے اعلان کردہ تعطیلات کے علاوہ پیر سے جمعہ تک روزانہ 2 مرتبہ، صبح اور شام، سونے اور چاندی کے نرخ جاری کرتا ہے تاکہ تاجروں اور صارفین کو تازہ ترین معلومات دستیاب رہ سکیں۔

صارفین کے لیے یہ بات بھی اہم ہے کہ آئی بی جے اے کی جانب سے جاری قیمتوں میں جی ایس ٹی شامل نہیں ہوتا۔ اس کے علاوہ زیورات خریدنے کی صورت میں میکنگ چارجز الگ سے ادا کرنے ہوتے ہیں، جس کے باعث مختلف شہروں اور جیولری شو رومز میں حتمی قیمتوں میں فرق دیکھنے کو مل سکتا ہے۔ بہرحال، آئی بی جے اے کی ویب سائٹ پر ہفتہ اور اتوار کے دن سونے اور چاندی کے نرخ جاری نہیں کیے جاتے، اس لیے کاروباری ہفتے کے دوران ہی قیمتوں میں ہونے والی تبدیلیوں کی سرکاری معلومات دستیاب ہوتی ہیں۔

بازار کے مبصرین کا کہنا ہے کہ اگر قیمتوں میں یہی رجحان برقرار رہا تو آنے والے دنوں میں سونا اور چاندی خریدنے کے خواہش مند افراد کو مزید فائدہ حاصل ہو سکتا ہے، تاہم سرمایہ کاروں کو عالمی معاشی حالات اور قیمتی دھاتوں کی بین الاقوامی منڈی پر بھی نظر رکھنی چاہیے۔