گوا: راہل گاندھی کی موجودگی میں کانگریس امیدواروں نے لیا وفاداری کا حلف

گوا میں 4 فروری کو کانگریس کے سابق صدر راہل گاندھی کی موجودگی میں اسمبلی انتخاب لڑ رہے سبھی کانگریس امیدواروں نے پارٹی کے تئیں وفاداری کا حلف لیا۔ ’وفاداری کا حلف‘ نام سے منعقد ایک تقریب کے دوران سبھی امیدواروں نے نہ صرف پارٹی کے تئیں ایماندار رہنے کا عزم ظاہر کیا بلکہ گوا کی خوشحالی اور ترقی کے تئیں بھی وفادار رہنے کا حلف لیا۔

دراصل گوا میں گزشتہ اسمبلی انتخاب کا جب نتیجہ برآمد ہوا تھا تو کانگریس سب سے بڑی پارٹی بن کر سامنے آئی تھی۔ امید کی جا رہی تھی کہ کانگریس حکومت تشکیل دے گی، لیکن کچھ کانگریس اراکین اسمبلی نے بی جے پی کا دامن تھام لیا اور پھر بی جے پی حکومت بنانے میں کامیاب ہو گئی۔ اس بار کچھ ایسا معاملہ پیش نہ آئے، اس لیے سبھی امیدواروں کو پارٹی سے وفاداری کا حلف دلایا گیا ہے۔

واضح رہے کہ گوا کی 40 اسمبلی سیٹوں کے لیے 14 فروری کو ووٹنگ ہوگی اور نتائج 10 مارچ کو برآمد ہوں گے۔ کانگریس نے انتخاب کے لیے گوا فارورڈ پارٹی (جی ایف پی) کے ساتھ اتحاد کیا ہے۔ کانگریس نے ریاست میں 37 اور جی ایف پی نے 3 سیٹوں پر اپنے امیدوار اتارے ہیں۔