راجستھان میں عوامی مسائل پر اشوک گہلوت کا بی جے پی حکومت پر سخت حملہ، تمام دعوے کھوکھلے قرار دیے

جے پور: راجستھان کے سابق وزیر اعلیٰ اور کانگریس کے سینئر لیڈر اشوک گہلوت نے ریاستی حکومت کی کارکردگی اور ترقیاتی دعوؤں کو شدید تنقید کا نشانہ بنایا ہے۔ انہوں نے کہا کہ موجودہ حکومت کے تمام دعوے کھوکھلے ہیں اور عوام مختلف مسائل میں گھری ہوئی ہے۔ انہوں نے خاص طور پر پانی کی قلت اور منریگا مزدوروں کی حالت زار پر تشویش ظاہر کی۔

گہلوت نے کہا کہ حکومت کے دوہرے معیار کو دیکھنا حیران کن ہے۔ ایک طرف وزراء عوامی جلسوں میں بلند بانگ دعوے کر رہے ہیں، تو دوسری طرف عام آدمی روزمرہ کی بنیادی ضروریات کے لیے پریشان ہے۔ انہوں نے الزام لگایا کہ وزیر اعلیٰ جو کچھ کہہ رہے ہیں، وہ ان کے اپنے خیالات نہیں بلکہ انہیں اس طرح بات کرنے کے لیے مجبور کیا جا رہا ہے۔ ان دعووں کا زمینی حقیقت سے کوئی تعلق نہیں۔

انہوں نے منریگا مزدوروں کے حوالے سے کہا کہ ان پر کام کا اضافی بوجھ ڈال دیا گیا ہے، جس سے انہیں کئی جسمانی اور مالی مشکلات کا سامنا ہے۔ گہلوت کا کہنا تھا کہ حکومت کو چاہیے کہ مزدوروں سے ایک گھنٹہ کم کام لیا جائے تاکہ ان کی حالت بہتر ہو سکے، لیکن انتظامیہ ان کے مسائل پر کوئی توجہ نہیں دے رہا۔

اس کے علاوہ انہوں نے ‘آپریشن سندور’ سے متعلق راہل گاندھی کے سوالات پر بی جے پی کی تنقید کا جواب دیتے ہوئے کہا کہ اپوزیشن لیڈر کا فرض ہے کہ وہ سوالات اٹھائے۔ اگر وہ سوال نہ کریں تو کل کو عوام پوچھے گی کہ آپ نے اپنی ذمہ داری کیوں نہیں نبھائی۔

بین الاقوامی امور پر بھی گہلوت نے کھل کر رائے دی۔ انہوں نے امریکی صدر ڈونلڈ ٹرمپ کی جانب سے بھارت و پاکستان کے درمیان جنگ بندی (سیز فائر) کے اعلان پر سوال اٹھاتے ہوئے کہا کہ امریکہ کا اس میں کوئی کردار نہیں ہونا چاہیے تھا۔ یہ فیصلہ دونوں ممالک کی باہمی رضامندی سے ہونا چاہیے تھا، لیکن ٹرمپ نے اپنی مرضی سے مداخلت کی۔

انہوں نے کہا کہ تاریخ گواہ ہے کہ امریکہ نے کبھی بھی ہندوستان کا ساتھ نہیں دیا۔ کارگل جنگ کے وقت بھی وہ غیر جانبدار رہا۔ ایسی صورت میں ہندوستان کو دو ٹوک موقف اختیار کرتے ہوئے امریکہ کو واضح پیغام دینا چاہیے۔