دہلی میں کورونا اموات میں اچانک اضافہ ، 103 افراد ہلاک، 576 نئے معاملے

دارالحکومت دہلی میں گزشتہ 24 گھنٹوں کے دوران کورونا وائرس کے 576 نئے مریضوں کی اطلاع ملی ہے اور اس عرصے کے دوران 103 مریضوں کی موت ہوگئی ہے۔اموات میں اضافہ اچانک نظر آ یاہے۔

خوشی کی بات یہ ہے کہ صحت یاب ہونے والے لوگوں کی تعداد نئے متاثرہ افراد سے کہیں زیادہ ہے۔ اس عرصے کے دوران انفیکشن سے صحت یاب ہونے والوں کی تعداد 1،287 رہی۔ اس مدت کے دوران مثبت شرح 0.78 فیصد پر آگئی۔

دارالحکومت میں صحت یاب ہونے والے افراد کی تعداد میں اضافے کے بعد فعال معاملوں میں کمی واقع ہوئی ہے۔ دہلی میں بدھ کو سرگرم معاملے 814 اور کم ہوکر 9،364 پر آگئے۔

دہلی کے محکمہ صحت کی طرف سے جاری کردہ بلیٹن کے مطابق اس عرصے کے دوران 576 نئے معاملے سامنے آنے کے بعد متاثرہ افراد کی تعداد 14،27،439 ہوگئی ہے ، جب کہ1,287 اور مریضوں کے صحت یاب ہونے کی وجہ سے کورونا سے صحتیاب ہونے والوں کی تعداد بڑھ کر 13،93،673 ہوگئی۔

اس دوران مزید 103 مریضوں کی ہلاکت کی وجہ سے ہلاکتوں کی تعداد بڑھ کر مجموعی طور سے 24،237 ہوگئی۔ دارالحکومت میں اموات کی شرح کم ہوکر صرف 1.7 فیصد رہ گئی ہے۔ دہلی مرنے والوں کے معاملے میں تیسرے نمبر پر ہے۔دارالحکومت میں گزشتہ 24 گھنٹوں کے دوران 73،453 نمونوں کی جانچ کی گئی۔ دریں اثنا ، دارالحکومت میں کنٹیمنٹ زون کی تعداد 17،770 ہوگئی ہے۔