ہماچل کے بلاس پور میں کانگریس کے سابق رکن اسمبلی پر 12 راؤنڈ فائرنگ، اسپتال میں داخل

ہولی کے دن ہماچل پردیش کے بلاس پور سے ایک بڑی خبر آئی ہے۔ کانگریس کے سینئر رہنما اور سابق رکن اسمبلی بامبر ٹھاکر کو بلاس پور میں نامعلوم حملہ آوروں نے گولی مار دی ہے۔ واقعے کے بعد بامبر ٹھاکر کو اسپتال میں داخل کرایا گیا، جہاں ان کا علاج جاری ہے۔ نامعلوم حملہ آوروں کی فائرنگ سے سابق ایم ایل اے کے پی ایس او بھی گولی لگنے سے زخمی ہوگئے۔

ہماچل پردیش کے وزیر اعلیٰ سکھوندر سنگھ سکھو نے اس سلسلے میں کہا کہ انہوں نے بامبر ٹھاکر سے بات کی اور انہیں بہتر علاج کے لیے ایمس میں داخل ہونے کو کہا لیکن وہ صرف آئی سی ایم سی میں ہی علاج کروانا چاہتے ہیں۔ وزیراعلیٰ نے مزید کہا کہ انہوں نے پولیس کو ہدایت کی ہے کہ ملزمان کی جلد از جلد شناخت کی جائے۔

موصولہ اطلاعات کے مطابق واقعہ کے وقت کانگریس کے سینئر رہنما بامبر ٹھاکر اپنی رہائش گاہ پر موجود تھے۔ نامعلوم افراد نے ان کی رہائش گاہ پر 12 راؤنڈ فائرنگ کی۔ اس دوران بامبر ٹھاکر اور ان کا پی ایس او گولی لگنے سے زخمی ہو گیا۔ بامبر ٹھاکر اور ان کے پی ایس او کو کمر اور پیٹ میں گولیاں ماری گئیں۔

نیوز پورٹل ’آج تک‘ پر شائع خبر کے مطابق واقعہ کی اطلاع ملتے ہی پولیس نے موقع پر پہنچ کر تفتیش شروع کردی۔ معاملے کے بارے میں پولیس ترجمان ڈی ایس پی مدن دھیمان نے بتایا کہ پولیس نے موقع پر پہنچ کر معاملہ درج کر لیا ہے۔ پولیس نے واقعے میں ملوث حملہ آوروں کی گرفتاری کے لیے تفتیش شروع کردی ہے۔

یہ واقعہ جائے وقوعہ کے قریب نصب سی سی ٹی وی کیمرے میں قید ہو گیا ہے۔ سی سی ٹی وی کیمرے کی فوٹیج میں تقریباً چار حملہ آور دکھائی دے رہے ہیں۔ دو حملہ آوروں نے سابق رکن اسمبلی بامبر ٹھاکر پر فائرنگ کی جبکہ دو حملہ آور گیٹ پر کھڑے ہیں۔ جس کے بعد حملہ آور بھاگتے ہوئے نظر آ رہے ہیں۔ پولیس نے سی سی ٹی وی کے ذریعہ  ملزمان کی شناخت بھی شروع کر دی ہے۔

واضح رہے کہ سابق رکن اسمبلی بامبر ٹھاکر پر 23 فروری 2024 کو ریلوے لائن کنسٹرکشن کمپنی کے دفتر کے باہر  بھی حملہ کیا گیا تھا۔ پولیس نے اس معاملے میں 11 لوگوں کے خلاف مقدمہ درج کیا تھا۔