ادھم پور بم دھماکوں میں ملوث سابق ملی ٹنٹ گرفتار، سٹکی بم برآمد: دلباغ سنگھ

جموں: جموں وکشمیر پولیس کے سربراہ دلباغ سنگھ نے اتوار کے روز کہا کہ ادھم پور حملے میں سٹکی بموں کا استعمال کیا گیا۔ انہوں نے کہا کہ حملے میں ملوث ایک سابق ملی ٹنٹ کو حراست میں لے کر اُس کے قبضے سے سٹکی بم اور آئی ای ڈیز برآمد کی گئیں۔ اُن کے مطابق سابق ملی ٹنٹوں کو پھر سے ملی ٹینٹ سرگرمیوں کے لئے استعمال میں لایا جا رہا ہے تاہم اب سابق ملی ٹینٹوں پر خصوصی نظر رکھی جائے گئی۔ ان باتوں کا اظہار موصوف نے جموں میں ایک پُر ہجوم پریس کانفرنس کے دوران کیا۔

دلباغ سنگھ نے کہا کہ گزشتہ دنوں اُدھم پور میں ہوئے دو دھماکوں کی تحقیقات کے بعد معلوم ہوا ہے کہ ملی ٹینٹوں نے سٹکی بموں کا استعمال کیا ہے۔ انہوں نے بتایا کہ پولیس نے کئی مشتبہ افراد کو حراست میں لے کر اُن سے پوچھ تاچھ کی جس دوران ایک سابق ملی ٹنٹ نے اپنا جرم قبول کر لیا۔ انہوں نے کہا کہ مذکورہ ملی ٹنٹ سال 2005 میں سرگرم تھا اور پھر اُس کی گرفتاری عمل میں لائی گئی اور بعد میں وہ رہا ہوا۔ اُن کے مطابق پاکستان میں بیٹھے ملی ٹینٹ ہینڈلرز سابق ملی ٹنٹوں کو پھر سے ملی ٹینٹ حملوں کے لئے استعمال میں لا رہے ہیں۔

موصوف پولیس سربراہ نے کہا کہ حملے میں ملوث سابق ملی ٹنٹ اسلم شیخ کی گرفتاری عمل میں لائی گئی ہے اور اُس کے قبضے سے چار آئی ای ڈی اور سٹکی بم برآمد کئے گئے ہیں۔ اُنہوں نے کہا کہ مذکورہ سابق ملی ٹینٹ وزیر داخلہ کے دورے جموں وکشمیر کے پیش نظر مزید حملوں کی فراق میں تھا۔ اُن کے مطابق اسلم شیخ نے اُدھم پور حملے میں ملوث ہونے کا اعتراف کر لیا ہے۔

دلباغ سنگھ نے کہا کہ پاکستان میں بیٹھے ملی ٹینٹ محمد امین بٹ عرف خبیب گرفتار سابق ملی ٹینٹ اسلم شیخ کے رابطے میں تھا۔ اسلم شیخ کو تین سٹکی بم اور چار آئی ای ڈیز فراہم کئے گئے تھے۔ سابق ملی ٹنٹوں کو پھر سے ملی ٹینٹ صفوں میں شامل کرنے کے بارے میں پوچھے گئے سوال کے جواب میں پولیس چیف نے کہا کہ ہم سابق ملی ٹینٹوں اور اعانت کاروں پر خصوصی نظر رکھے ہوئے ہیں۔

انہوں نے بتایا کہ ادھم پور حملے میں ملوث سابق ملی ٹنٹ کی گرفتاری کے بعد یہ باور ہو رہا ہے کہ مزید سابق ملی ٹنٹوں کو سٹکی بم حملوں کے لئے تیار کرنے کا امکان ہے۔ پولیس سربراہ کے مطا بق سٹکی بم اب سیکورٹی ایجنسیوں کے لئے بڑا چیلنج اُبھر کر سامنے آیا ہے۔ انہوں نے مزید کہا کہ جموں وکشمیر میں اس وقت حالات پوری طرح سے معمول پر ہیں جو سماج دشمن عناصر کو ناگوار گزر رہا ہے۔