دہلی آلودگی پر سابق لیفٹیننٹ گورنر کرن بیدی کا اظہار تشویش، وزیر اعظم مودی کو لکھا خط

راجدھانی دہلی میں بڑھتی ہوئی فضائی آلودگی پر ہر کوئی فکر مند نظر آ رہا ہے۔ اب راجدھانی دہلی کی آلودہ ہوا کے متعلق سابق لیفٹیننٹ گورنر اور آئی پی ایس افسر کرن بیدی نے بھی تشویش کا اظہار کیا ہے۔ انہوں نے وزیر اعظم نریندر مودی کو خط لکھ کر کہا کہ ’’ہوا مسلسل زہریلی ہوتی جا رہی ہے، لیکن انتظامی تال میل اور طویل مدتی منصوبہ بندی کی کمی اس بحران کو ہر سال مزید سنگین بنا رہی ہے۔‘‘

کرن بیدی کے ذریعہ وزیر اعظم مودی کو لکھے گئے خط میں مذکور ہے کہ ’’دہلی-این سی آر کی ہوا کا معیار اب صحت عامہ کے لحاظ سے ایمرجنسی بن چکا ہے اور اسے صرف عارضی اقدامات سے حل نہیں کیا جا سکتا۔‘‘ اپنی ’ایکس‘ پوسٹ میں کرن بیدی نے کہا کہ اپنی مدت کار میں کئی قومی چیلنجوں پر بروقت کارروائی کو جس طرح یقینی بنایا تھا، اسی طرح کی اعلیٰ سطحی اور باقاعدہ نگرانی آج دہلی کے آلودگی کے بحران کو روکنے کے لیے ضروری ہے۔

کرن بیدی نے خط کے ذریعہ وزیر اعظم مودی کو 4 مشورے بھی دیے کیے ہیں۔ ان کا کہنا ہے کہ تینوں پڑوسی ریاستوں کے وزرائے اعلیٰ اور چیف سکریٹریوں کے ساتھ وزیر اعظم کی ہر ماہ آن لائن میٹنگ ہونی چاہیے۔ ساتھ ہی اعلیٰ سطح پر باقاعدہ جائزہ لینے سے ریاستوں میں جوابدہی بڑھے گی اور حالات کو خراب ہونے سے روکا جا سکے گا۔ اس کے علاوہ انہوں نے وزیر اعظم مودی سے ’من کی بات‘ پروگرام کے ذریعہ عوامی شرکت کا پیغام دینے کا مشورہ دیا ہے۔ محکمانہ ہم آہنگی کی کمی کو دور کرنے کے مشورہ کے ساتھ ہی انتظامیہ کو فعال کیے جانے کی بات بھی کہی ہے۔ ان کا یہ بھی کہنا ہے کہ حکومت صرف میٹنگوں سے نہیں چلتی، بلکہ افسران کو میدان میں اتر کر صورتحال کا حقیقی اندازہ لگانا چاہیے۔

کرن بیدی کا کہنا ہے کہ ہر سال آلودگی کا بحران اس لیے پیدا ہوتا ہے کہ کہ حکومت فوری اقدامات پر انحصار کرتی ہیں، جیسے اسماگ ٹاور اور آڈ-ایون۔ اسی طرح کئی ایجنسیوں کے درمیان ذمہ داری تقسیم ہوتی ہے۔ اس کے علاوہ گاڑیوں، صنعتی، تعمیراتی دھول اور پرالی جیسے آلودگی کے بڑے ذرائع کو مؤثر طریقے سے کنڑول نہیں کیا جاتا۔ ساتھ ہی طویل مدتی منصوبوں کے مقابلہ میں قلیل مدتی سیاسی فوائد فوقیت پا جاتے ہیں۔ جبکہ صحیح معنوں میں بہتری کے لیے مضبوط نفاذ، صاف توانائی اور ٹرانسپورٹ میں طویل مدتی سرمایہ کاری کی ضرورت ہے۔