سیف علی خان حملے کے معاملہ میں رہا کیے گئے شخص کے والد کا الزام، ’ممبئی پولیس نے بیٹے کی زندگی برباد کر دی!’

ممبئی میں 16 جنوری کو سیف علی خان پر ان کے فلیٹ پر ہوئے حملے کے سلسلے میں گرفتار کیے گئے شخص آکاش کنوجیا کے والد نے الزام عائد کیا ہے کہ ممبئی پولیس کی غلطی نے ان کے بیٹے کی زندگی تباہ کر دی ہے۔ آکاش کنوجیا، جو کہ چھتیس گڑھ کے ضلع درگ سے تعلق رکھتا ہے، کو 18 جنوری کو ممبئی پولیس کی اطلاع پر ریلوے پروٹیکشن فورس (آر پی ایف) نے شالیمار ایکسپریس سے حراست میں لیا تھا۔

کنوجیا کو 19 جنوری کو ممبئی پولیس کے ذریعے ایک بنگلہ دیشی شہری، شریف الاسلام، کی گرفتاری کے بعد رہا کیا گیا۔ کنوجیا تھانے ضلع کے ٹٹوالا علاقے کی اندرانگر چال میں رہائش پذیر ہے۔

آکاش کے والد، کیلاش کنوجیا نے کہا، ’’پولیس نے میرے بیٹے کی شناخت کی تصدیق کیے بغیر اسے حراست میں لے لیا۔ اس غلطی نے اس کی زندگی برباد کر دی ہے۔ آکاش اب ذہنی دباؤ کے باعث نہ تو کام پر توجہ دے پا رہا ہے اور نہ ہی گھر والوں سے زیادہ بات چیت کرتا ہے۔‘‘

انہوں نے مزید کہا، "اس کی ملازمت چلی گئی اور شادی بھی ختم ہو گئی۔ کون ذمہ دار ہے؟ پولیس کے رویے نے میرے بیٹے کا مستقبل برباد کر دیا ہے۔‘‘ آکاش کنوجیا کی گرفتاری اور رہائی کے بعد خاندان شدید ذہنی دباؤ کا شکار ہے اور اس واقعے نے پولیس کی کارروائی پر کئی سوالات اٹھائے ہیں۔