فرخ آباد کی ایس پی آرتی سنگھ کو الٰہ آباد ہائی کورٹ نے طلب کیا، غیرقانونی حراست اور جبراً بیان کا ہے معاملہ

فرخ آباد پولیس سپرنٹنڈنٹ (ایس پی) آرتی سنگھ کو الٰہ آباد ہائی کورٹ میں اس وقت سخت کارروائی کا سامنا کرنا پڑا، جب ہیبیس کارپس عرضی گزار کو دھمکی دینے اور ان کے وکیل کو گرفتار کرنے کا معاملہ سامنے آیا۔ جسٹس جے جے منیر اور جسٹس سنجیو کمار کی بنچ نے اس معاملہ کو عدالتی معاملہ میں مداخلت قرار دیتے ہوئے ناراضگی کا اظہار کیا ہے۔ اترپردیش کی حکومت کی درخواست پر سماعت کے بعد عدالت نے ایس پی آرتی سنگھ کو بدھ (15 اکتوبر) تک ذاتی طور پر حلف نامہ داخل کرنے اور اپنی پوری ٹیم کے ساتھ ذاتی طور پر موجود رہنے کا حکم دیا ہے۔ یہ سخت ہدایات پریتی یادو کی ہیبیس کارپس عرضی کے بعد جاری کی گئی ہے۔

واضح رہے کہ فرخ آباد کی رہنے والی پریتی یادو کی جانب سے داخل کی گئی ہیبیس کارپس عرضی نے پولیس کی سنگین من مانی کا پردہ فاش کیا ہے۔ پریتی نے الزام عائد کیا کہ 8 ستمبر کی رات 9 بجے پولیس (تھانہ انچارج انوراگ مشرا، سی او سمیت دیگر پولیس اہلکار) ان کے گھر میں داخل ہوئے اور فیملی کے 2 ممبران کو حراست میں لے لیا، جنہیں تقریباً ایک ہفتہ تک غیرقانونی طور پر رکھا گیا۔ رہائی سے قبل پولیس نے پریتی سے جبراً یہ تحریری بیان لیا کہ وہ پولیس کے خلاف کوئی شکایت یا کوئی عرضی داخل نہیں کریں گی۔ پولیس نے یہی بیان عدالت میں پیش کیا، جس پر جسٹس جے جے منیر اور جسٹس سنجیو کمار کی بنچ نے سخت رخ اپناتے ہوئے ایس پی کو طلب کر لیا ہے۔

ہندی نیوز پورٹل ’آج تک‘ پر شائع خبر کے مطابق منگل کو عدالت میں حاضر ہونے کے بعد پریتی یادو نے تصدیق کر دی کہ انہوں نے ہی عرضی داخل کی تھی۔ انہوں نے عدالت کو بتایا کہ عرضی واپس لینے کے لیے ان پر دباؤ بنایا گیا تھا، کیونکہ پولیس ان کے شوہر کو گرفتار کر کے لے گئی تھی۔ عدالت نے اس معاملہ کو سنجیدگی سے لیتے ہوئے آگے کی کارروائی کے لیے افسروں کو طلب کیا ہے۔ ہائی کورٹ نے غیرقانونی حراست اور جبراً بیان کے معاملہ میں فرخ آباد کی ایس پی آرتی سنگھ کی سخت سرزنش کی۔ عرضی گزار پریتی یادو نے ایس پی کی موجودگی میں پولیس کی ہراسانی کی کہانی سنائی۔ عدالت نے ایس پی کو بدھ کو بھی موجود رہنے اور ریاستی حکومت کو جواب داخل کرنے کا حکم دیا ہے۔

واضح رہے کہ ڈویژن بنچ نے منگل کو ایس پی آرتی سنگھ دائرہ اختیار کے افسر راجیش کمار دویدی اور تھانہ انچارج قائم گنج انوراگ مشرا سے مذکورہ معاملہ میں وضاحت طلب کی، لیکن ان افسران نے کوئی تسلی بخش جواب نہیں دیا۔ عدالت کی ناراضگی دیکھتے ہوئے حکومت کی جانب سے پیش ہوئے ایڈیشنل ایڈووکیٹ جنرل امت کمار سکسینہ نے عرضی گزار کے الزامات پر صفائی دینے کے لیے 24 گھنٹہ کا وقت مانگا، جسے عدالت نے قبول کر لیا۔ ساتھ ہی عدالت نے فرخ آباد ایس پی کو دوپہر 12 بجے تک پریاگ راج میں ہی رکنے اور آئندہ سماعت میں ذاتی طور پر موجود رہنے کا حکم دیا ہے۔