کسان تنظیمیں متحد، جگجیت سنگھ ڈلیوال کی بھوک ہڑتال 49ویں دن بھی جاری

سنیوکت کسان مورچہ (ایس کے ایم) کے غیر سیاسی دھڑے کے رہنما جگجیت سنگھ ڈلیوال کی بھوک ہڑتال سنگرور کے کھنوری بارڈر پر پیر کو 49ویں دن بھی جاری رہی۔ ڈاکٹروں نے ان کی بگڑتی ہوئی صحت کے بارے میں خبردار کرتے ہوئے کہا کہ کوئی بھی ناخوشگوار واقعہ پیش آ سکتا ہے۔

اسی دوران، پاتڑاں میں ایس کے ایم کے دونوں دھڑوں (سیاسی اور غیر سیاسی) کی مشترکہ میٹنگ ہوئی۔ میٹنگ میں فیصلہ کیا گیا کہ 18 جنوری کو کسان رہنما ایک بار پھر ملاقات کریں گے تاکہ مرکز کی نئی زرعی مارکیٹنگ پالیسی کے خلاف متحدہ حکمت عملی تیار کی جا سکے۔

میٹنگ کے دوران کسان رہنماؤں نے اعلان کیا کہ ریاست بھر میں لوہڑی کے موقع پر نئی زرعی پالیسی کے مسودے کو نذر آتش کیا گیا تاکہ مرکز کی پالیسیوں کے خلاف ناراضگی ظاہر کی جا سکے۔

میٹنگ میں سرون سنگھ پنڈھیر، کاکا سنگھ کوٹڑا، ابھیمنیو کوہاڑ، جوگندر سنگھ اوگراہاں، بلبیر سنگھ راجےوال، رمندر پٹیالہ اور ڈاکٹر درشن پال سمیت کئی کسان رہنما موجود تھے۔ کسانوں نے پاتڑاں کے گردوارہ صاحب میں نہایت ہم آہنگی کے ساتھ گفتگو کی اور مرکز کے خلاف اجتماعی جدوجہد کا عزم کیا۔

دریں اثنا، سونی پت سے کسانوں کا ایک قافلہ جگجیت سنگھ ڈلیوال کی حمایت میں کھنوری پہنچا جبکہ کیتھل سے کسان منگل کو شامل ہوں گے۔ ہریانہ کے کسانوں نے کہا کہ وہ ڈلیوال کے پیغام اور جدوجہد کو گاؤں گاؤں پہنچائیں گے۔

کسان رہنما کی صحت سے متعلق معاملے پر سپریم کورٹ 15 جنوری کو سماعت کرے گی۔ جسٹس سوریہ کانت اور جسٹس این کوٹسور سنگھ کی بنچ ڈلیوال کی درخواست پر غور کرے گی۔ عدالت پنجاب حکومت کے ان افسران کے خلاف توہین عدالت کی درخواست پر بھی سماعت کرے گی جنہوں نے 20 دسمبر کو ڈلیوال کو اسپتال لے جانے کے حکم پر عمل نہیں کیا تھا۔