منصفانہ انتخابات بیلٹ پیپر سے ہی ممکن، ای وی ایم پر شک ہے اور رہے گا، حنان ملا نے حکومت کو بنایا نشانہ

الیکٹرانک ووٹنگ مشین(ای وی ایم) کے حوالے سے سی پی آئی (ایم) کے رہنما حنان ملا نے دعویٰ کیا ہے کہ اگر منصفانہ انتخابات کرانا مقصود ہے تو بیلٹ پیپر ہی واحد متبادل ہے۔ سی پی آئی (ایم) لیڈر کا یہ بیان ایسے وقت میں آیا ہے جب کرناٹک میں ایک سروے میں دعویٰ کیا گیا ہے کہ ای وی ایم پر83 فیصد سے زیادہ لوگوں نے اعتماد کا اظہار کیا ہے۔ حالانکہ یہ سروے کرانے والی این جی او ’گرام‘ کی معتبریت پر سوال کھڑے ہوگئے ہیں۔

اس سروے کے بارے میں سی پی آئی (ایم) لیڈر نے کہا کہ ای وی ایم پر شک ہے اور رہے گا، اس میں چھیڑ چھاڑ کی جا سکتی ہے۔ جن ممالک میں ای وی ایم شروع کی گئی تھی وہاں سے بھی ای وی ایم کو ہٹا دیا گیا ہے۔ انہوں نے کہا کہ دیکھا جا رہا ہے کہ انتخابات میں ایک پارٹی کو زبردست حمایت حاصل ہوتی ہے لیکن انتخابی نتائج میں دوسری پارٹی جیت جاتی ہے۔ منصفانہ انتخابات بیلٹ پیپر سے ہی ہوتا ہے اس لئے بیلٹ پیپر سے ہی انتخابات کرائے جانے چاہئیں۔

دریں اثنا فلم اسٹار شاہ رخ خان کی آئی پی ایل ٹیم کولکتہ نائٹ رائیڈر کے لیے بنگلہ دیشی کرکٹر مستفیض الرحمان کے انتخاب پر کہانی کار دیوکی نندن ٹھاکر کی جانب سے تنازع کھڑا کرنے پر حنان ملا نے کہا کہ میں ہمیشہ ایسے کسی بھی لیڈر کی مذمت کرتا ہوں جو مذہب، سیاست کو کھیل اور ثقافت کے ساتھ جوڑ کر دیکھتا ہے۔  انہوں نے کہا کہ کھیل، گیمس اور ثقافت کو ایسے اثرات سے مکمل طور پرالگ رکھا جانا چاہئے۔ مذہب اور سیاست کا استعمال اکثر غلط مقاصد کے لئے کیا جاتا ہے۔

وہیں اندور میں آلودہ پانی کی وجہ سے ہونے والی اموات کے معاملے میں لیباریٹری رپورٹ پرسی پی آئی (ایم) کے رہنما حنان ملا نے کہا کہ بدقسمتی سے یہ پروپیگنڈا کیا جا رہا ہے کہ اندور ملک کا سب سے صاف شہر ہے، لیکن زمینی حقیقت کیا ہے؟ شہر کے بڑے حصے میں پینے کا صاف پانی دستیاب نہیں ہے۔ آلودہ پانی سے ایک درجن سے زیادہ لوگ لقمہ اجل بن چکے ہیں اور سینکڑوں لوگ اسپتالوں میں داخل ہیں۔ حکومت کو دھیان دینا چاہیے تھا کیونکہ مقامی لوگ لگاتار آلودہ پانی کے بارے میں سوال اٹھارہے ہیں۔ انہوں نے کہا کہ جب میڈیا سوال پوچھ رہا ہے تو قابل اعتراض الفاظ کہے جارہے ہیں۔ حکومت کواس کے خلاف سخت کارروائی کرتے ہوئے یہ یقینی بنانا چاہئے کہ لوگوں کو صاف اور محفوظ پانی دستیاب ہو۔

اسی دوران ریلوے وزیر اشونی وشنو کے بلٹ ٹرین کی تاریخ کا اعلان کرنے پرحنان ملا نے کہا کہ ہندوستان میں ٹرینیں، شتابدی، راجدھانی آئی، مستقبل میں تکنیک کا استعمال ہوکر نئی ٹرینیں آئیں گی۔ انہوں نے کہا کہ بلیٹ ٹرین کا اعلان صرف انتخابات تک محدود ہے۔ آسام، بنگال میں انتخابات ہیں تو بلیٹ ٹرین کا اعلان کیا گیا ہے۔