سچ سامنے لانے والے صحافیوں پر ایف آئی آر درج کروا رہی یوگی حکومت: پرینکا گاندھی

کانگریس کی جنرل سکریٹری پرینکا گاندھی نے جمعہ کے روز وارانسی میں ایک صحافی پر ہوئی ایف آئی آر کو لے کر یوگی حکومت کو تنقید کا نشانہ بنایا اور کہا کہ سچائی سامنے لانے پر یو پی حکومت صحافیوں، سابق افسران اور اپوزیشن لیڈران پر ایف آئی آر کروا رہی ہے۔ پرینکا گاندھی نے جمعہ کے روز کیے گئے اپنے ایک ٹوئٹ میں لکھا ہے کہ "یو پی حکومت ایف آئی آر کر کے سچائی پر پردہ ڈال نہیں سکتی۔ زمین پر اس وبا کے دوران زبردست بدانتظامی ہے۔ سچائی دکھانے سے اس میں بہتری ممکن ہے لیکن یو پی حکومت صحافیوں پر، سابق افسران پر، اپوزیشن پر سچائی سامنے لانے کے لیے ایف آئی آر کروا رہی ہے۔"

دراصل وارانسی کے ڈومری گاؤں کی ایک خاتون نے نیوز پورٹل کے صحافی اور مدیر کے خلاف ایف آئی آر درج کرائی ہے کیونکہ ان کی ایک رپورٹ میں مبینہ طور پر خاتون کی باتوں کو غلط طریقے سے پیش کرنے کے ساتھ ساتھ ان کی ذات اور مالی حالت کا بھی مذاق اڑایا گیا ہے۔

کوتوالی کے مقامی افسر پردیپ سنگھ چندیل کا اس سلسلے میں کہنا ہے کہ "ڈومری گاؤں کی ایک خاتون نے گزشتہ ہفتہ رام نگر پولس اسٹیشن جا کر اپنی شکایت درج کرائی تھی جس کی بنیاد پر ایک نئے پورٹل کے چیف ایڈیٹر اور رپورٹر کے خلاف ایف آئی آر درج کی گئی ہے۔" افسر نے مزید بتایا کہ "یہ شکایت تعزیرات ہند کی دفعہ 269، 501 اور ایس سی ایس ٹی ایکٹ کی مختلف دفعات کے تحت درج کی گئی ہے۔"