11 ریاستوں کی 56 اسمبلی سیٹوں پر ضمنی انتخابات کی تاریخوں کا اعلان

ایک طرف بہار میں اسمبلی انتخابات کی تاریخوں کے اعلان کے بعد سیاسی سرگرمیاں تیز ہو گئی ہیں، اور اب دوسری طرف 11 ریاستوں کی 56 اسمبلی سیٹوں پر ضمنی انتخابات کی تاریخوں کا اعلان بھی الیکشن کمیشن آف انڈیا نے کر دیا ہے۔ قابل ذکر بات یہ ہے کہ ایک لوک سبھا سیٹ پر بھی ضمنی انتخاب کی تاریخ کا اعلان ہوا ہے اور وہ ہے بہار کی والمیکی نگر لوک سبھا سیٹ۔ اس سیٹ پر 7 نومبر کو ووٹنگ کی تاریخ طے کی گئی ہے۔

جن 11 ریاستوں کی 56 اسمبلی سیٹوں کے لیے ضمنی انتخابات کی تاریخوں کا اعلان ہوا ہے، ان میں مدھیہ پردیش کافی اہم ہے، کیونکہ یہاں 28 سیٹوں پر ضمنی انتخابات ہونے ہیں۔ یہاں ووٹنگ کے لیے 3 نومبر کی تاریخ مقرر کی گئی ہے۔ اتر پردیش کی 7 اسمبلی سیٹوں پر بھی ضمنی انتخابات کے لیے 3 نومبر کی ہی تاریخ مقرر ہوئی ہے اور منی پور کی دو اسمبلی سیٹوں کو چھوڑ کر بقیہ ریاستوں میں بھی پولنگ 3 نومبر کو ہی ہوگی۔ منی پور کی دو اسمبلی سیٹ پر 7 نومبر کو پولنگ کا اعلان کیا گیا ہے اور سبھی کے نتائج 10 نومبر کو برآمد ہو جائیں گے۔

اس درمیان الیکشن کمیشن نے کیرالہ تمل ناڈو، آسام اور مغربی بنگال کی 7 اسمبلی سیٹوں پر فی الحال ضمنی انتخاب نہیں کرانے کا فیصلہ کیا ہے۔ کمیشن نے اس کے پیچھے کی وجہ بتائی ہے کہ ان ریاستوں کے چیف سکریٹریوں اور چیف الیکشن افسران نے انتخاب کرانے میں کچھ دقتوں کی بات کہی تھی۔

بہر حال، ضمنی انتخابات کے لیے نامزدگی داخل کرنے کی آخری تاریخ 16 اکتوبر ہے اور 19 اکتوبر تک نامزدگی واپس لی جا سکتی ہیں۔ جن لوک سبھا اور اسمبلی سیٹوں پر ضمنی انتخابات کی تاریخ کا اعلان کیا گیا ہے، ان کی مکمل فہرست درج ذیل ہے...