کانگریس امیدوار کو پاکستانی ایجنٹ بتانے والے بی جے پی لیڈر پر انتخابی کمیشن کا رویہ نرم!

مدھیہ پردیش کے جھابوا اسمبلی سیٹ کے ضمنی انتخاب میں تشہیر کے دوران کانگریس امیدوار کانتی لال بھوریا کو پاکستان کا نمائندہ بتانے والے اپوزیشن لیڈر گوپال بھارگو کے بیان کو انتخابی کمیشن نے انتخابی ضابطہ کی خلاف ورزی مانتے ہوئے انھیں آگے سے ایسا نہیں کرنے کی نصیحت دی ہے۔ کمیشن نے ان سے کہا ہے کہ مستقبل میں اس طرح کی بیان بازی نہ کریں۔ انتخابی کمیشن نے بھارگو کو اجلاس، روڈ شو اور انٹرویو کے دوران سنبھل کر بولنے اور اس طرح کی باتیں نہیں کہنے کی ہدایت دی ہے۔

اس معاملے پر کانگریس ترجمان جے پی دھنوپیا نے بتایا کہ بی جے پی لیڈر گوپال بھارگو نے 30 ستمبر کو جھابوا میں کانگریس امیدوار کو پاکستان کا نمائندہ بتایا تھا، جس کی الیکشن کمیشن سے شکایت کی گئی تھی۔ انھوں نے کہا کہ کمیشن سے شکایت میں بھارگو کے جھابوا میں انتخابی تشہیر کرنے پر پابندی لگائے جانے کا بھی مطالبہ کی اگیا تھا دھنوپیا نے بتایا کہ اس معاملے میں انتخابی کمیشن نے بھارگو کے بیان کو انتخابی ضابطہ اخلاق کی خلاف ورزی مانا ہے۔

بتا دیں کہ جھابوا میں 30 ستمبر کو بی جے پی امیدوار بھانو بھوریا کی نامزدگی داخل کرنے کے بعد منعقد جلسہ میں گوپال بھارگو نے کہا تھا ’’یہ انتخاب دو پارٹیوں کے درمیان نہیں ہے۔ یہ ہندوستان اور پاکستان کے درمیان کا انتخاب ہے۔ بھانو بھائی ہندوستان کی نمائندگی کرتے ہیں اور کانتی لال بھوریا پاکستان کی نمائندگی کرتے ہیں۔ اس لیے یہاں موجود لوگ بتائیں کہ وہ ہندوستان کے ساتھ ہیں یا پاکستان کے ساتھ۔‘‘

اتنا ہی نہیں، بھارگو نے بی جے پی امیدوار کو کامیاب بنانے کا عزم کرتے ہوئے کہا تھا کہ ’’اگر یہاں کانگریس جیت گئی تو یہ پیغام جائے گا کہ پاکستان کی حمایت کرنے والی پارٹی کی حکومت کا نمائندہ جیت گیا اور ہندوستان کا نمائندہ جو ہندوستانی ہے، قبائلی ہے، جو گاؤں میں محنت کرتا ہے، اگر اس کی شکست ہوتی ہے تو یہ ہندوستان کی شکست ہوگی۔ آپ کی شکست ہوگی، آپ کی ہار ہوگی۔ اس الیکشن میں ملک کی عزت داؤ پر ہے۔ کیونکہ کانگریس ان دنوں ہر معاملے میں پاکستان کی حمایت کر رہا ہے۔‘‘ اس سلسلے میں انتخابی افسر کے ذریعہ بھارگو کے خلاف کوتوالی تھانہ میں معاملہ بھی درج کرایا گیا تھا۔