چار ریاستوں کی ایک-ایک اسمبلی سیٹ پر ضمنی انتخابات 23 ستمبر کو

نئی دہلی: الیکشن کمیشن نے چھتیس گڑھ، کیرالہ، تری پورہ اور اتر پردیش کی چار خالی اسمبلی سیٹوں کے لئے ضمنی انتخابات23 ستمبر کو کرانے کا اعلان کیا ہے۔ الیکشن کمیشن نے اتوار کے روز ایک پریس ریلیز میں یہ اعلان کیا۔چھتیس گڑھ کی دنتے واڑہ سیٹ، کیرالہ کی پالا، تریپورہ کی بادھارگھاٹ اور اترپردیش کی ہمیر پور سیٹوں کے لئے ضمنی انتخابات ہونے ہیں۔

اترپردیش کی ہمیر پور سیٹ پر رکن اسمبلی اشوک چندیل کو نااہل قرار دیئے جانے کے بعد ضمنی انتخاب کرایا جارہا ہے جبکہ دنتے واڑہ، بادھار گھاٹ اور پالا میں رکن اسمبلی کے انتقال کے سبب ضمنی انتخاب کرایا جارہا ہے۔ قابل ذکر ہے کہ بادھار گھاٹ سیٹ سے بی جے پی رکن اسمبلی دلیپ سرکار پانچ بار کانگریس رکن اسمبلی رہ چکے ہیں اور 2017 میں سات دیگر کانگریس اراکین اسمبلی کے ساتھ وہ بی جے پی میں شامل ہو گئے تھے۔ طویل علالت کے بعد دلیپ سرکار کا انتقال اسی سال یکم اپریل کو ہو گیا تھا۔

ضمنی انتخابات کے لئے نوٹیفکیشن 28 اگست کو جاری کیا جائے گا۔ پرچہ نامزدگی کی آخری تاریخ چار ستمبر ہے، جبکہ پانچ ستمبر کو اس کی جانچ پڑتال ہوگی اور سات ستمبر تک کاغذات نامزدگی واپس لئے جا سکیں گے۔ ووٹوں کی گنتی 27 ستمبر کو ہوگی۔ انتخابی کمیشن کے بیان کے مطابق چار ریاستوں کے ضمنی انتخاب والے اضلاع یا اسمبلی حلقہ کے حصے میں آئینی نوٹیفکیشن جاری ہوتے ہی انتخابی ضابطہ اخلاق نافذ ہو جائے گا۔