ڈنکی روٹ معاملہ: ای ڈی نے دہلی کے ٹکٹ ایجنٹ ترون کھوسلا کو کیا گرفتار

نئی دہلی: انفورسمنٹ ڈائریکٹوریٹ (ای ڈی) نے ڈنکی روٹ معاملے میں دہلی کے ٹکٹ ایجنٹ ترون کھوسلا کو منی لانڈرنگ کے الزام میں گرفتار کیا ہے۔ ای ڈی کے مطابق، کھوسلا امریکہ جانے کے خواہش مند ہندوستانیوں کو غیر قانونی اور خطرناک راستوں سے امریکہ پہنچانے والے نیٹ ورک کا اہم رکن تھا۔ اس معاملے کا تعلق فروری 2025 میں امریکہ سے ملک بدر کیے گئے ہندوستانی شہریوں سے ہے۔

ای ڈی کے ایک سرکاری بیان کے مطابق، ایجنسی کے جالندھر زونل دفتر نے 23 اکتوبر کو منی لانڈرنگ کی روک تھام کے قانون (پی ایم ایل اے)، 2002 کے تحت ترون کھوسلا کو گرفتار کیا۔ خصوصی پی ایم ایل اے عدالت نے اسے 30 اکتوبر تک ای ڈی کی تحویل میں بھیج دیا ہے۔

ای ڈی کی تحقیقات میں انکشاف ہوا ہے کہ کھوسلا پنجاب اور ہریانہ کے متعدد ایجنٹوں کے ساتھ مل کر کام کرتا تھا۔ یہ ایجنٹ امریکہ جانے کے خواہش مند افراد سے پاسپورٹ اور رقم جمع کرکے دہلی میں کھوسلا کے حوالے کرتے تھے۔ اس کے بعد وہ گیانا، سرینام، ایکواڈور اور ایل سلواڈور جیسے جنوبی اور وسطی امریکی ممالک کے ویزے اور ہوائی ٹکٹوں کا انتظام کرتا تھا۔ اس نیٹ ورک کے ذریعے لوگوں کو غیر قانونی راستوں سے امریکہ کی سرحد تک پہنچایا جاتا تھا۔

تحقیقات کے مطابق، ایجنٹ لوگوں کو قانونی طریقے سے امریکہ بھیجنے کا جھانسہ دیتے تھے، لیکن بعد میں انہیں ڈنکی روٹ کے ذریعے بھیج دیا جاتا تھا۔ اس کے لیے ہر شخص سے 30 لاکھ سے 60 لاکھ روپے تک وصول کیے جاتے تھے۔ یہ معاملہ اس وقت سامنے آیا جب میکسیکو کی سرحد کے راستے غیر قانونی طور پر امریکہ میں داخل ہونے کی کوشش کرنے والے 300 سے زیادہ ہندوستانی شہریوں کو ملک بدر کر دیا گیا۔

ای ڈی نے پنجاب اور ہریانہ پولیس کی جانب سے درج متعدد ایف آئی آر کی بنیاد پر تحقیقات شروع کی تھیں۔ ایجنسی نے 9 اور 11 جولائی 2025 کو 19 مقامات پر چھاپے مارے تھے، جہاں سے دستاویزات، ڈیجیٹل آلات اور نکاراگوا و ایتھوپیا کے جعلی امیگریشن اور ویزا اسٹامپ برآمد ہوئے تھے۔

ای ڈی کے مطابق، اس معاملے میں 5.41 کروڑ روپے کی منقولہ اور غیر منقولہ جائیدادیں بھی عارضی طور پر ضبط کی گئی تھیں۔ بعد ازاں 18 اور 19 دسمبر 2025 کو پنجاب، ہریانہ اور دہلی میں تلاشی کے دوران کھوسلا کے ٹھکانوں سے 4.62 کروڑ روپے نقد، تقریباً 5.9 کلوگرام سونا اور 313 کلوگرام چاندی برآمد کی گئی، جن کی مجموعی مالیت 19.14 کروڑ روپے بتائی گئی ہے۔ تلاشی کے دوران 50 سے زیادہ افراد کے اصل پاسپورٹ، لین دین کے ریکارڈ، ڈائریاں، جائیداد کے دستاویزات اور ڈیجیٹل آلات بھی ملے۔

ای ڈی کا کہنا ہے کہ کھوسلا کے موبائل فون سے ملنے والی چیٹ اور دیگر شواہد سے غیر ملکی ہوائی اڈوں پر امیگریشن کلیئرنس، ٹکٹوں کے انتظام اور ادائیگیوں میں اس کے کردار کا پتہ چلا ہے۔

ایجنسی کے مطابق، وہ میکسیکو اور برازیل میں موجود ان غیر ملکی رابطوں کے ساتھ بھی رابطے میں تھا جو لوگوں کو سرحد پار کرانے اور اس سے متعلق ادائیگیوں کا انتظام کرتے تھے۔ تحقیقات میں یہ بھی سامنے آیا کہ مالی سال 2022-23 سے 2024-25 کے دوران کھوسلا کی ملکیتی فرم ’بی جے انٹرنیشنل‘ کے بینک اکاؤنٹ میں نقد رقم جمع کرانے کے 414 لین دین کے ذریعے مجموعی طور پر 30.38 کروڑ روپے جمع کیے گئے تھے۔