دہلی میں اندوہناک حادثہ، بھلسوا ڈمپنگ سائٹ کا بڑا حصہ ٹوٹا، کئی گھر ملبے کی زد میں

دہلی میں بھلسوا ڈمپنگ سائٹ کا ایک حصہ گرنے سے بڑا حادثہ سرزد ہوا ہے۔ جانکاری کے مطابق اس کی زد میں آنے سے کئی گھر ملبے میں دب گئے ہیں۔ خبر ملنے کے بعد مقامی تھانہ پولیس بھی موقع پر پہنچ گئی۔ فی الحال اس حادثے میں کسی کے بھی جانی نقصان کی اطلاع نہیں ملی ہے۔ ملبہ ہٹانے کا کام ہنوز جاری ہے۔

میڈیا رپورٹ کے مطابق پیر کی صبح بھلسوا ڈمپنگ سائٹ کا کوڑے کے ڈھیر سے بنا ایک پہاڑ نما بڑا حصہ آس پاس کی جھگیوں میں جا گرا۔ اس ڈمپنگ سائٹ کے قریب میں کئی جھگی نما گھر بنے ہوئے ہیں۔ بتایا گیا ہے کہ یہاں کافی لوگ ان گھروں میں رہتے ہیں۔ اچانک ملبہ گرنے سے لوگوں کے گھروں کے دروازے تک بند ہو گئے۔ بارش کے دوران پوری ڈمپنگ سائٹ دلدل ہو گئی ہے۔ خطرناک بات یہ ہے کہ ڈمپنگ سائٹ کا مزید حصہ گرنے کا خوف بنا ہوا ہے۔

غور طلب ہے کہ ڈمپنگ سائٹ کو لے کر حال ہی میں قومی سبز ریگولیٹری نے کہا تھا کہ ٹھوس فضلات اب بھی ایک سنگین مسئلہ ہیں، اور اب وقت آ گیا ہے کہ ایسے مقامات کو صاف کیا جائے اور جمع ٹھوس کوڑے کو ختم کرنے کے لیے سائنسی طریقہ اختیار کیا جائے۔