ملک میں مذہب کے نام پر فسادات ہو رہے ہیں، مودی خاموش ہیں: دگ وجے

انڈین نیشنل کانگریس کے سینئر رہنما اور مدھیہ پردیش کے سابق وزیر اعلیٰ دگ وجے سنگھ نے وزیر اعظم نریندر مودی کی خاموشی پر حملہ کرتے ہوئے کہا ہے کہ ملک میں مذہب کے نام پر فسادات ہو رہے ہیں۔ مودی ایک لفظ بھی نہیں بولتے۔

راجیہ سبھا ممبر پارلیمنٹ دگ وجے سنگھ سرکٹ ہاؤس میں صحافیوں سے بات چیت کر رہے تھے۔ انہوں نے کہا کہ ملک میں مذہبی جنون پھیلتا ہے، نفرت پھیلائی جاتی ہے لیکن مودی ایک لفظ بھی نہیں بولتے۔ ایسے واقعات اور حالات میں جو بھی قصوروار ہے اس کے خلاف سخت کارروائی کی جائے۔ انہوں نے کہا کہ ہمیں اقتدار کی نہیں ملک کی فکر ہے۔ آج ملک کے حالات خراب ہوتے جا رہے ہیں۔

سماجی ہم آہنگی کا فقدان انتہائی تشویشناک ہے۔ کانگریس تنظیم پورے ملک میں اپناایجنڈاغریبوں، کسانوں، مزدوروں کے لیے نافذکرناچاہ رہی ہے، اس لیے ہم جدوجہد کر رہے ہیں۔ ملک میں پیسے کی قدر کم ہو رہی ہے، غربت بڑھ رہی ہے، غریب غریب تر ہوتا جا رہا ہے، کروڑ پتی ارب پتی بن رہا ہے، ارب پتی کھرب پتی بن رہے ہیں، صورتحال تشویشناک ہے۔ انہوں نےکورونا کی راحت بھی غریبوں تک نہ پہنچنے کی بات کہتے ہوئے مرکزی حکومت کو آڑے ہاتھوں لیا۔

مسٹرسنگھ نے کہا کہ بلڈوزر چلانا ہے تو مہنگائی-بے روزگاری پر چلائیں، سماجی برائیوں کے خلاف چلائیں، لیکن آج بی جے پی حکومت سنگھ کے اشارے پر توجہ ہٹانے کا کام کر رہی ہے، جس کی وجہ سے دشمنی میں اضافہ ہوتاجارہا ہے۔ انہوں نے کہا کہ فرقہ وارانہ جنون بی جے پی کا سب سے خطرناک سیاسی ہتھیار ہے۔ ایک سوال کے جواب میں مسٹر سنگھ نے کہا کہ اکھنڈ بھارت کا مطلب پاکستان کا ہندوستان میں شامل ہونا ہے جس کا وزیر اعظم مودی کو جواب دینا چاہیے۔

مسٹر سنگھ آج سابق ایم ایل اے ڈاکٹر راج کمار جے پال کے یہاں شادی کے پروگرام میں شرکت کرنے آئے تھے۔ انہوں نے یہاں خواجہ صاحب کی درگاہ پر حاضری دے کر مخملی چادر اور عقیدت کے پھول چڑھائے۔ پشکر پہنچنے کے بعد انہوں نے مقدس سروور کی پوجا کی اور برہما جی کے درشن کئے۔