ایودھیا: رام مندر تعمیر کےلئے پتھر لانے کا سلسلہ شروع

ایودھیا : بابری مسجد رام مندر تنازع پر سپریم کورٹ کی جانب سے حتمی فیصلہ کے تحت متنازع اراضی رام للّا کو دیئے جانے کے بعد ہندو طبقہ پرجوش ہے اور ایک مرتبہ پھر سے ایودھیا میں پتھروں کو پہنچانے کا سلسلہ شروع ہو گیا ہے۔ متنازع مقام پر بابری مسجد کو شہید کیے جانے کے بعد سے لگاتار پتھر تراشنے کا کام کیا جا رہا تھا اور اس کے لئے باقاعدہ ایک ورک شاپ قائم کی گئی ہے۔ ایودھیا تنازعہ پر سپریم کورٹ کے فیصلہ سے چند روز قبل ہی اس ورک شاپ میں کام بند ہوا تھا۔

اب جبکہ سپریم کورٹ کے فیصلہ کے بعد متنازع مقام سے مسجد کو بے دخل کر دیا گیا ہے اور مندر تعمیر کا راستہ صاف ہو گیا ہے تو ہندو طبقہ کی جانب سے پتھر پہنچانے کا کام پھر سے شروع کر دیا گیا ہے۔ اسی ضمن میں، رامیشورم سے آنے والے زائرین کا ایک گروپ ہفتہ کے روز پتھروں کا ایک مجموعہ لے کر ایودھیا پہنچا ہے اور اسے وشو ہندو پریشد (وی ایچ پی) کی طرف سے قائم کی گئی ورکشاپ میں عطیہ کیا۔

نصف درجن کے قریب لوگوں نے رامیشورم کی ایک تنظیم رام سینا کے ارکان ہونے کا دعویٰ کیا، جو رامیشورم سے 12 ’کٹے ہوئے پتھر‘ اپنے ساتھ لائے اور ایودھیا میں رام مندر ورک شاپ (رام مندر پتھر تراشنے والی ورکشاپ) کے لئے عطیہ کیا۔

رام سینا کے قومی سکریٹری ہونے کا دعوی کرنے والے مدن گوپال نے خبر رساں ایجنسی آئی اے این ایس کو بتایا، ’’جب مندر کی تعمیر شروع ہوگی، تو ہمارے رام سینا کے کارکنان ’کارسیوا‘ (رضاکارانہ خدمات) کے لئے ایودھیا آئیں گے۔‘‘ واضح رہے کہ وشو ہندو پریشد نے سنہ 1989 میں ’شیلانیاس‘ (تحویل میں لی گئی اراضی پر رام مندر کے لئے سنگ بنیاد رکھنا) انجام دینے سے پہلے ہر گاؤں سے پتھر اکٹھا کرنے کی مہم چلائی تھی۔

وی ایچ پی کے مرکزی سکریٹری پُرشوتم نارائن سنگھ نے کہا، ’’اب جبکہ سپریم کورٹ کے فیصلہ کے بعد رام جنم بھومی پر ایک عظیم الشان رام مندر کی تعمیر کی راہ ہموار ہو گئی ہے تو لوگ تعمیر میں استعمال ہونے والے پتھر (اینٹ) لا رہے ہیں۔ یہ ان کا عقیدہ ہے جو ہماری ورکشاپ میں لا رہا ہیں، جو کوئی بھی پتھر لائے گا ہم اسے قبول کریں گے۔‘‘

وی ایچ پی پتھر تراشنے والی ورکشاپ میں پتھروں کا ڈھیر لگا ہوا ہے۔ عقیدتمنداگان ان پتھروں کی پوجا کر رہے ہیں اور یہاں تک کہ ان کے ساتھ سیلفیاں بھی لے رہے ہیں۔