امریکہ سے 104 ہندوستانیوں کی ملک بدری، جے شنکر کا پارلیمنٹ میں بیان، عمل کو جائز قرار دیا

نئی دہلی: امریکہ سے 104 ہندوستانیوں کی ملک بدری پر وزیر خارجہ ایس جے شنکر نے پارلیمنٹ میں بیان دیتے ہوئے کہا کہ غیر قانونی تارکین وطن کو ملک بدر (ڈی پورٹ) کرنے کا عمل کوئی نیا نہیں ہے، بلکہ یہ کئی سالوں سے جاری ہے۔ انہوں نے کہا کہ امریکہ میں قومی سلامتی اور امیگریشن قوانین کے تحت یہ کارروائیاں معمول کے مطابق ہوتی ہیں اور ہندوستان بھی دیگر ممالک کی طرح اپنے غیر قانونی تارکین وطن کو واپس لینے کا پابند ہے۔

جے شنکر نے کہا کہ امریکہ میں غیر قانونی طور پر مقیم ہندوستانی شہری مشکل حالات میں تھے، اور انہیں واپس لانا ضروری تھا۔ انہوں نے واضح کیا کہ ڈی پورٹیشن کا عمل 2012 سے رائج اسٹینڈرڈ آپریٹنگ پروسیجر (ایس او پی) کے مطابق ہوتا ہے، جس کے تحت فلائٹ میں بیلٹ یا ہتھکڑی لگائی جاتی ہے لیکن خواتین اور بچوں کو اس سے مستثنیٰ رکھا جاتا ہے۔ دورانِ سفر، ٹوائلٹ جانے کے لیے انہیں ہتھکڑی کھول دی جاتی ہے۔

وزیر خارجہ نے اقوامِ متحدہ کی ایک اہم دستاویز کا حوالہ دیتے ہوئے کہا کہ عالمی سطح پر قانونی امیگریشن کی حوصلہ افزائی اور غیر قانونی ہجرت کی حوصلہ شکنی کی جاتی ہے۔ انہوں نے زور دیا کہ غیر قانونی طریقے سے بیرون ملک بھیجے جانے والے افراد کو مشکل حالات کا سامنا کرنا پڑتا ہے، اس لیے قانونی امیگریشن کو فروغ دینا ہم سب کی ذمہ داری ہے۔

جے شنکر نے مزید کہا کہ ہندوستانی حکومت امریکی حکام کے مسلسل رابطے میں ہے تاکہ یہ یقینی بنایا جا سکے کہ ڈی پورٹ کیے گئے شہریوں کے ساتھ کسی بھی قسم کا غیر انسانی سلوک نہ ہو۔ انہوں نے یہ بھی کہا کہ حکومت غیر قانونی امیگریشن میں ملوث ایجنٹوں کے خلاف سخت کارروائی کے حق میں ہے تاکہ مستقبل میں ایسے واقعات کو روکا جا سکے۔

انہوں نے اعداد و شمار پیش کرتے ہوئے بتایا کہ 2009 سے ہر سال ہندوستانی شہریوں کو مختلف ممالک سے ڈی پورٹ کیا جاتا رہا ہے اور امریکہ بھی اپنے قوانین کے مطابق ایسا کرتا ہے۔ جے شنکر نے کہا کہ حکومت کی کوشش ہے کہ ہندوستانی شہری قانونی طریقوں سے بیرون ملک جائیں اور غیر قانونی ہجرت سے بچیں۔