دہلی: رِٹھالا میٹرو اسٹیشن کے قریب خوفناک آتشزدگی، تقریباً 50 جھگیاں جل کر خاکستر

ملک کی راجدھانی دہلی میں جمعرات (5 مارچ) کی صبح آگ لگنے کا ایک بڑا واقعہ سامنے آیا ہے۔ رِٹھالا میٹرو اسٹیشن کے قریب واقع جھگیوں میں اچانک آگ لگ گئی، جس سے علاقے میں افراتفری مچ گئی۔ آگ اس قدر شدید تھی کہ دیکھتے ہی دیکھتے کئی جھگیاں اس کی زد میں آ گئیں۔ فائر بریگیڈ کے مطابق آگ لگنے کی اطلاع صبح تقریباً 4:15 بجے ملی تھی۔ اطلاع ملتے ہی محکمہ فائر بریگیڈ فوری طور پر حرکت میں آیا اور تقریباً 15 گاڑیوں کو جائے وقوع کے لیے روانہ کیا گیا۔ موقع پر پہنچ کر فائر فائٹرز نے آگ بجھانے کا کام شروع کر دیا۔

فائر فائٹرز کو آگ بجھانے میں کافی مشقت کرنی پڑی۔ جھگیوں میں آتش گیر مادہ ہونے اور جھونپڑیوں کے ایک دوسرے سے جڑے ہونے کی وجہ سے آگ تیزی سے پھیل گئی تھی۔ تاہم کئی گھنٹوں کی سخت محنت کے بعد فائر فائٹرز نے آگ پر تقریباً قابو پا لیا ہے۔ واقعہ کے وقت زیادہ تر لوگ سو رہے تھے، لیکن آگ کی لپٹیں دیکھ کر مقامی لوگ فوراً باہر نکل آئے۔ آس پاس کے لوگوں نے بھی آگ بجھانے اور لوگوں کو محفوظ باہر نکالنے میں مدد کی۔ راحت کی بات یہ ہے کہ اس حادثے میں اب تک کسی جانی نقصان کی کوئی اطلاع نہیں ملی ہے۔ تاہم آگ کی وجہ سے کئی خاندانوں کا سامان جل کر پوری طرح راکھ ہو گیا ہے، جس سے لاکھوں روپے کا نقصان ہوا ہے۔

ابتدائی معلومات کے مطابق رٹھالا میٹرو اسٹیشن کے قریب لگنے والی اس آگ میں تقریباً 50 جھگیاں جل کر خاکستر ہو گئی ہیں۔ آگ لگنے کی وجوہات کا اب تک واضح طور پر پتہ نہیں چل سکا ہے۔ محکمہ فائر بریگیڈ اور مقامی انتظامیہ معاملے کی تحقیقات میں مصروف ہے۔ فی الحال آگ پر مکمل طور پر قابو پا لیا گیا ہے اور فائر فائٹرز جائے وقوعہ پر موجود ہیں اور صورتحال پر نظر رکھے ہوئے ہیں۔ انتظامیہ کی جانب سے متاثرہ افراد کو امداد پہنچانے کی تیاریاں بھی کی جا رہی ہیں۔