دہلی میں شدید فضائی آلودگی پر بی جے پی اور عآپ میں تنازعہ، سرسا اور سوربھ کے ایک دوسرے پر الزامات

دہلی میں فضائی آلودگی کے مسئلے پر ایک بار پھر سیاسی کشیدگی بڑھ گئی ہے۔ دہلی حکومت کے وزیر منجندر سنگھ سرسا نے منگل کو عام آدمی پارٹی (عآپ) اور اروند کیجریوال پر شدید حملہ کیا اور الزام عائد کیا کہ عآپ جان بوجھ کر پنجاب کے کسانوں کو پرالی جلانے کے لیے اکسا رہی ہے تاکہ دہلی کی ہوا مزید آلودہ ہو اور عوام میں ناراضگی بڑھے۔

سرسا نے کہا کہ پنجاب میں عآپ کے رہنما کسانوں کو چہرہ ڈھانپ کر پرالی جلانے پر مجبور کر رہے ہیں تاکہ ان کی شناخت نہ ہو۔ سرسا نے مزید کہا، ’’میں آپ کو دکھانا چاہتا ہوں کہ عام آدمی پارٹی کس طرح کسانوں کو پرالی جلانے پر مجبور کر رہی ہے۔ کسان خود یہ نہیں کرنا چاہتے لیکن انہیں ایسا کرنے کے لیے کہا جا رہا ہے۔‘‘ ان کا کہنا تھا کہ عآپ کا مقصد دہلی کے آلودگی کے مسئلہ کے لیے کسانوں کو ذمہ دار ٹھہرانا اور دیوالی کو بدنام کرنا ہے۔

سرسا نے کیجریوال پر مذہبی جذبات کو ٹھیس پہنچانے کا بھی الزام لگایا۔ ان کے مطابق، دیوالی کے موقع پر پٹاخوں پر پابندی عائد کی جاتی ہے لیکن دوسری مذہبی رسومات پر خاموشی اختیار کی جاتی ہے۔ سرسا نے کہا، ’’جب بقرعید پر سڑکوں پر جانوروں کی قربانی دی جاتی ہے تو کیا کیجریوال کچھ کہتے ہیں؟ یہ لوگ دیوالی کو بدنام کرنے میں لگے ہوئے ہیں اور اورنگزیب کی طرح ہندو روایات پر حملہ کر رہے ہیں۔‘‘

جواب میں سوربھ بھاردواج نے ایک اسکرین شاٹ شیئر کیا ہے جس میں دکھایا گیا ہے کہ پنجاب کا اے کیو آئی (ایئر کوالٹی انڈیکس) 156 ہے۔ سوربھ نے پوسٹ میں لکھا، ’’ایک انپڑھ کہہ رہا ہے پنجاب میں پرالی جلانے سے دہلی کی فضائی آلودگی میں اضافہ ہو گیا۔ مسئلہ یہ ہے کہ پنجاب کا اے کیو آئی صرف 156 ہے۔‘‘