یمنا کے سیلابی میدان میں پارکنگ اور مذہبی سرگرمیوں پر پابندی، دہلی ہائی کورٹ کا ڈی ڈی اے کو سخت حکم

نئی دہلی: دہلی ہائی کورٹ نے یمنا کے سیلابی میدانوں میں واقع سُر گھاٹ علاقے کو ماحولیاتی اعتبار سے نہایت حساس قرار دیتے ہوئے وہاں ہر طرح کی تجارتی اور مذہبی سرگرمیوں پر روک لگا دی ہے۔ عدالت نے دہلی ترقیاتی اتھارٹی کو ہدایت دی کہ اس علاقے میں کسی بھی قسم کی پارکنگ کی اجازت نہ دی جائے، چاہے وہ کسی مذہبی یا سماجی موقع پر آنے والے لوگوں کی سہولت کے لیے ہی کیوں نہ ہو۔

جسٹس جسميت سنگھ کی سربراہی والی سنگل جج بنچ نے اپنے حکم میں کہا کہ زون-او کے تحت آنے والے یمنا سیلابی میدانوں کی زمین پر گاڑیوں کی پارکنگ سمیت کسی بھی تجارتی سرگرمی کی اجازت نہیں دی جا سکتی۔ عدالت نے واضح کیا کہ ماحولیاتی تحفظ اور علاقے کی حساسیت کو نظر میں رکھتے ہوئے اس مقام کو ہر قسم کی تجارتی اور مذہبی سرگرمیوں سے محفوظ رکھنا ضروری ہے۔

عدالت نے یہ حکم سریش کمار کی جانب سے دائر درخواست پر سماعت کے بعد جاری کیا۔ درخواست گزار نے مطالبہ کیا تھا کہ سُر گھاٹ پر موجود پارکنگ مقام کا قبضہ اسے دوبارہ دیا جائے۔ اس نے کہا کہ ستمبر 2022 میں دہلی میونسپل کارپوریشن کی جانب سے جاری ٹینڈر میں وہ سب سے زیادہ بولی لگانے والا قرار پایا تھا اور سکیورٹی رقم و پیشگی لائسنس فیس جمع کرانے کے بعد اسے تین برس کے لیے پارکنگ چلانے کا حق دیا گیا تھا۔

سماعت کے دوران عدالت کو بتایا گیا کہ دہلی ترقیاتی اتھارٹی نے میونسپل کارپوریشن کو صرف 2508 مربع میٹر زمین دی تھی، جبکہ میونسپل ادارے نے درخواست گزار کو 3780 مربع میٹر زمین الاٹ کر دی۔ بعد میں دہلی ترقیاتی اتھارٹی نے اپنی اجازت واپس لے لی اور 31 جنوری 2025 کو پارکنگ الاٹمنٹ منسوخ کر دی گئی۔

عدالت نے اپنے حکم میں دہلی ترقیاتی اتھارٹی کے اس موقف کا بھی ذکر کیا کہ سُر گھاٹ کی زمین ترقیاتی منصوبوں کے لیے فوری طور پر خالی کرانا ضروری تھا کیونکہ یہ علاقہ یمنا کے سیلابی میدانوں کا حصہ ہے۔ عدالت نے کہا کہ درخواست گزار نے منسوخی کے حکم کو چیلنج ہی نہیں کیا، اس لیے پارکنگ بحال کرنے کی اس کی مانگ قابل قبول نہیں ہے۔

جسٹس جسميت سنگھ نے کہا کہ منسوخی کی قانونی حیثیت اور معاوضے سے متعلق سوالات متنازع حقائق پر مبنی ہیں، جن پر رٹ درخواست میں فیصلہ نہیں کیا جا سکتا۔ عدالت نے درخواست گزار کو دیوانی مقدمہ دائر کر کے ہرجانے کا مطالبہ کرنے کی آزادی دی۔

ساتھ ہی عدالت نے دہلی ترقیاتی اتھارٹی کو ہدایت دی کہ اگر کسی مذہبی یا مبارک موقع پر یمنا کی پوجا کے لیے آنے والے افراد کے لیے پارکنگ کی ضرورت محسوس ہو تو سیلابی میدان سے دور کسی دوسرے مقام پر متبادل انتظام کیا جائے تاکہ ماحولیاتی حساس علاقے کو نقصان نہ پہنچے۔