عازمینِ حج کی میٹرو کے ذریعے ایئرپورٹ روانگی، دہلی حج کمیٹی کا نیا انتظام

نئی دہلی: دہلی اسٹیٹ حج کمیٹی نے حج 2026 کے عازمینِ حج کو رام لیلا میدان میں قائم حج کیمپ سے اندرا گاندھی بین الاقوامی ہوائی اڈہ ٹرمینل-3 تک ایئرپورٹ ایکسپریس میٹرو کے ذریعے منتقل کیا۔ اس سے قبل عازمینِ حج کو بسوں کے ذریعے ہوائی اڈہ پہنچایا جاتا تھا۔

دہلی اسٹیٹ حج کمیٹی کی جانب سے جاری پریس ریلیز کے مطابق اس اقدام کا مقصد ایندھن کی بچت، عوامی نقل و حمل کے استعمال کو فروغ دینا اور ماحولیاتی تحفظ کے تئیں بیداری پیدا کرنا ہے۔ کمیٹی نے اپنے بیان میں کہا کہ حالیہ عالمی معاشی حالات اور توانائی کے بحران کے پیش نظر عوامی ٹرانسپورٹ کے استعمال کی اہمیت بڑھ گئی ہے۔

پریس ریلیز میں کہا گیا کہ وزیر اعظم نریندر مودی کی جانب سے عوام سے کفایت شعاری اختیار کرنے اور غیر ضروری اخراجات کم کرنے کی اپیل کے تناظر میں یہ قدم اٹھایا گیا۔ کمیٹی کے مطابق عازمینِ حج کو نئی دہلی میٹرو اسٹیشن سے ایئرپورٹ ایکسپریس لائن کے ذریعے آئی جی آئی ایئرپورٹ ٹرمینل-3 تک پہنچایا گیا۔

اس موقع پر دہلی اسٹیٹ حج کمیٹی کی چیئرپرسن کوثر جہاں، ایگزیکٹو آفیسر اشفاق احمد عارفی، ڈپٹی ایگزیکٹو آفیسر محسن علی، دہلی انٹرنیشنل ایئرپورٹ لمیٹڈ، دہلی پولیس، سعودی ایئر لائنس، حج کمیٹی آف انڈیا اور دیگر متعلقہ اداروں کے افسران موجود تھے۔ حکام نے عازمینِ حج کے ساتھ میٹرو کے ذریعے سفر بھی کیا۔

چیئرپرسن کوثر جہاں نے اپنے بیان میں کہا کہ توانائی کے موجودہ عالمی بحران کے دوران ایندھن کی بچت اور عوامی ٹرانسپورٹ کے استعمال کو فروغ دینا ضروری ہے۔ انہوں نے کہا کہ حکومت کی جانب سے توانائی کے تحفظ سے متعلق دی گئی اپیل پر عمل کرنا سب کی مشترکہ ذمہ داری ہے۔

واضح رہے کہ دہلی سے حج 2026 کے لیے عازمینِ حج کی سعودی عرب روانگی کا سلسلہ 18 اپریل سے جاری ہے۔ دہلی اسٹیٹ حج کمیٹی کے مطابق میٹرو کے ذریعے منتقلی کا مقصد عوام میں اجتماعی ذمہ داری اور وسائل کے محتاط استعمال کا پیغام دینا بھی ہے۔