مدھیہ پردیش میں کسانوں کے مسائل پر کانگریس کا ’سڑک ستیہ گرہ‘، ممبئی-آگرہ قومی شاہراہ پر چکہ جام

بھوپال: مدھیہ پردیش میں کسانوں کے مسائل کو لے کر کانگریس نے جمعرات کو ریاست بھر میں احتجاجی مظاہرے کرتے ہوئے ممبئی-آگرہ قومی شاہراہ سمیت کئی اہم مقامات پر چکہ جام کیا۔ اس احتجاج کے باعث مختلف علاقوں میں ٹریفک بری طرح متاثر ہوا اور گاڑیوں کی لمبی قطاریں دیکھنے کو ملیں۔ کانگریس نے بھارتیہ جنتا پارٹی حکومت پر کسانوں کے مسائل کو نظرانداز کرنے اور وعدوں سے روگردانی کا الزام لگایا ہے۔

اندور کے پگڈمبر علاقے میں ہونے والے مظاہرے کے دوران آگرہ-ممبئی قومی شاہراہ پر دونوں جانب ٹریفک جام ہو گیا۔ احتجاج میں بڑی تعداد میں کانگریس کارکنان، کسان اور پارٹی رہنما شریک ہوئے۔ اس دوران کئی مقامات پر ٹریکٹروں کے ساتھ مظاہرہ کیا گیا اور حکومت مخالف نعرے لگائے گئے۔

آدیواسی کانگریس کے قومی صدر وکرانت بھوریا نے کہا کہ مدھیہ پردیش کی معیشت کسانوں پر منحصر ہے لیکن بھارتیہ جنتا پارٹی کے دور حکومت میں کسانوں کو ان کا جائز حق اور انصاف نہیں مل رہا۔ انہوں نے الزام لگایا کہ سویابین بھاونتر یوجنا میں بڑے پیمانے پر لوٹ ہوئی ہے اور منڈیاں کارپوریٹ مفادات کا مرکز بن چکی ہیں۔ ان کے مطابق حکومت کسانوں کو ان کی فصلوں کا کم از کم امدادی قیمت دلانے میں ناکام رہی ہے۔

کانگریس کے قومی سکریٹری ستیہ نارائن پٹیل نے کہا کہ ریاستی حکومت کسانوں کے مسائل پر ’کمبھ کرن کی نیند‘ سو رہی ہے۔ انہوں نے کہا کہ کسان اپنے بنیادی حقوق کا مطالبہ کر رہے ہیں، کوئی بھیک نہیں مانگ رہے۔ ان کا کہنا تھا کہ گیہوں کی سرکاری خرید مناسب مقدار میں نہیں ہو رہی جبکہ کسان کھاد اور بیج کی قلت سے بھی پریشان ہیں۔

ریاستی کانگریس صدر جیتو پٹواری نے شاجاپور میں احتجاج کی قیادت کرتے ہوئے الزام لگایا کہ بھارتیہ جنتا پارٹی نے کسانوں سے کیے گئے وعدے پورے نہیں کیے۔ انہوں نے کہا کہ دھان 3100 روپے فی کوئنٹل، گیہوں 2700 روپے فی کوئنٹل اور سویابین 6000 روپے فی کوئنٹل خریدنے کی گارنٹی دی گئی تھی مگر کسان آج بھی اپنی فصل فروخت کرنے کے لیے کئی کئی دن دھوپ میں انتظار کرنے پر مجبور ہیں۔

پٹواری نے کہا کہ ریاست کے 97 فیصد کسان قرض میں ڈوبے ہوئے ہیں اور آن لائن رجسٹریشن کا نظام کسانوں کے لیے نئی مصیبت بن گیا ہے۔ انہوں نے خبردار کیا کہ اگر حکومت نے کسانوں کے مسائل حل نہ کیے تو آئندہ پورے مدھیہ پردیش سے گزرنے والی تمام قومی شاہراہوں کو جام کیا جائے گا۔

مظاہروں کے دوران کانگریس رہنماؤں نے الزام لگایا کہ حکومت عوامی مسائل سے توجہ ہٹانے کے لیے مذہب اور سماج کے نام پر سیاست کر رہی ہے، جبکہ کسان، نوجوان اور ملازمین مسلسل مشکلات کا سامنا کر رہے ہیں۔