مدھیہ پردیش زمین گھوٹالہ: کانگریس کا وزیر اعلیٰ موہن یادو کے خلاف ریاست گیر تحریک اور گھیراؤ کا اعلان

بھارتیہ جنتا پارٹی کی حکومت والے مدھیہ پردیش میں زمین گھوٹالے کے معاملے پر کانگریس نے وزیر اعلیٰ موہن یادو کے خلاف ریاست گیر عوامی تحریک شروع کرنے کا اعلان کیا ہے۔ کانگریس کے جنرل سکریٹری جے رام رمیش نے سوشل میڈیا پر جاری اپنے بیان میں الزام عائد کیا کہ مہاکال کی نگری اجین میں ہونے والی زمین کی لوٹ کا حساب پورا ملک مانگ رہا ہے، لیکن پورا سرکاری نظام وزیر اعلیٰ کو بچانے میں مصروف ہے۔

جے رام رمیش نے اپنے بیان میں کہا کہ بھارتیہ جنتا پارٹی اور راشٹریہ سویم سیوک سنگھ کے رہنما اجین سے لے کر ایودھیا تک بدعنوانی کے نئے ریکارڈ قائم کر رہے ہیں، اس بڑے گھوٹالے پر وزیر اعظم نریندر مودی کی خاموشی بھی سوالات کو جنم دے رہی ہے اور یہ خاموشی ملی بھگت کا اشارہ دیتی ہے۔ انہوں نے کہا کہ کانگریس عوام کے ساتھ مل کر اس معاملے پر سڑکوں پر اترے گی اور بدعنوان عناصر کے ساتھ ان کے سرپرستوں کو بھی بے نقاب کرے گی۔

اسی معاملے پر مدھیہ پردیش کانگریس کے صدر جیتو پٹواری نے بھی آئندہ دنوں کے لیے مرحلہ وار احتجاجی پروگرام کا اعلان کیا۔ انہوں نے کہا کہ پارٹی کے سینئر رہنما پہلے ڈویژن کی سطح پر اور اس کے بعد ضلع سطح پر پریس کانفرنسیں کریں گے، جن میں زمین گھوٹالے سے متعلق اعداد و شمار اور دستاویزات عوام کے سامنے پیش کیے جائیں گے۔

جیتو پٹواری نے بتایا کہ کانگریس ایک ہفتے کے اندر ایک خصوصی پورٹل بھی شروع کرے گی، جہاں ریاست کے شہری، صحافی اور دیگر افراد وزیر اعلیٰ، ان کے اہل خانہ، وزراء اور ان کے اہل خانہ کی قانونی اور غیر قانونی جائیدادوں سے متعلق معلومات جمع کرا سکیں گے۔ انہوں نے کہا کہ معلومات فراہم کرنے والوں کی شناخت خفیہ رکھی جائے گی۔

انہوں نے مزید اعلان کیا کہ پندرہ جولائی کو بھوپال میں وزیر اعلیٰ کی رہائش گاہ کا گھیراؤ کیا جائے گا اور ان سے بدعنوانی کے بارے میں جواب طلب کیا جائے گا۔ ان کے مطابق بیس سے پچیس جولائی کے درمیان ہونے والے اسمبلی اجلاس میں بھی اس معاملے کو اولین ترجیح کے ساتھ اٹھایا جائے گا اور وزیر اعلیٰ سے جواب مانگا جائے گا۔

جیتو پٹواری نے کہا کہ وزیر اعلیٰ جہاں بھی ریاست کے مختلف اضلاع کے دورے پر جائیں گے، وہاں کانگریس کے ضلعی صدور اپنے کارکنوں کے ساتھ ان سے اس معاملے پر جواب طلب کریں گے۔ انہوں نے کہا کہ اگر وزیر اعلیٰ نے وضاحت نہیں دی یا استعفیٰ نہیں دیا تو جولائی کے آخر تک اجین میں پچاس ہزار سے ایک لاکھ کارکنوں کی موجودگی میں بڑا احتجاج کیا جائے گا۔ ان کے مطابق کانگریس ایودھیا سے مہاکال تک بدعنوانی کے معاملے کو عوام کے سامنے لانے کی مہم چلائے گی اور وزیر اعلیٰ کو یا تو وضاحت دینے یا پھر استعفیٰ دینے پر مجبور کرے گی۔