منموہن سنگھ کی آخری رسومات میں ’شرمناک نظارہ‘ پر کانگریس ناراض، مودی حکومت کی بدانتظامی کو 9 نکات میں کیا ظاہر

سابق وزیر اعظم آنجہانی ڈاکٹر منموہن سنگھ کی آخری رسومات سے متعلق معاملے پر کانگریس نے مودی حکومت کو کٹہرے میں کھڑا کر دیا ہے۔ حکومت کی طرف سے یہ ضرور کہا گیا ہے کہ ڈاکٹر منموہن سنگھ کا دہلی میں اسمارک بنایا جائے گا اور اس کی جانکاری ان کے اہل خانہ کو دے دی گئی ہے، لیکن کانگریس کا کہنا ہے کہ آخری رسومات کسی ایسے مقام پر ادا کی جانی چاہیے تھیں جہاں بعد میں ان کا اسمارک (یادگار) بن سکے۔ یہ معاملہ تو سرخیوں میں ہے ہی، کانگریس نے مودی حکومت پر آخری رسومات کے دوران بدانتظامی کا سنگین الزام بھی عائد کر دیا ہے۔

کانگریس کا کہنا ہے کہ سابق وزیر اعظم ڈاکٹر منموہن سنگھ کی آخری رسومات کے دوران کئی محاذ پر بدنظمی دیکھنے کو ملی ہے۔ اس معاملے میں کانگریس کے سینئر لیڈر پون کھیڑا نے سوشل میڈیا پلیٹ فارم ’ایکس‘ پر ایک پوسٹ کیا ہے۔ اس پوسٹ میں انھوں نے 9 نکات پیش کرتے ہوئے حکومت کی بدنظمی کو ظاہر کیا ہے۔ انھوں نے لکھا ہے کہ ڈاکٹر منموہن سنگھ کی آخری رسومات جب سرکاری اعزاز کے ساتھ ادا کی جا رہی تھیں تو بے عزتی اور بدانتظامی کا حیرت انگیز نظارہ دیکھنے کو ملا۔ انھوں نے اس سلسلے میں جو 9 نکات پیش کیے ہیں، وہ اس طرح ہیں:

1. ڈی ڈی (دوردرشن) کو چھوڑ کر کسی بھی نیوز ایجنسی کو اجازت نہیں دی گئی؛ ڈی ڈی نے مودی اور شاہ پر توجہ مرکوز کی، ڈاکٹر سنگھ کے کنبہ کو بمشکل ہی کور کیا۔

2. ڈاکٹر سنگھ کے کنبہ کے لیے صرف 3 کرسیاں سامنے کی صف میں رکھی گئیں۔ کانگریس لیڈروں کو ان کی بیٹیوں اور کنبہ کے دیگر اراکین کے لیے سیٹوں کا انتظام کرنے میں جدوجہد کرنی پڑی۔

3. قومی پرچم کو ان کی بیوہ کے حوالے کیے جانے یا گارڈ آف آنر کے دوران وزیر اعظم اور وزراء نے کھڑے ہونے کی زحمت نہیں اٹھائی۔

4. آخری رسومات کے وقت ’چِتا‘ کے آس پاس فیملی کو مناسب جگہ نہیں دی گئی، کیونکہ ایک طرف فوجیوں نے جگہ گھیر رکھی تھی۔

5. عوام کو اندر آنے سے روکا گیا اور وہ باہر سے ہی آخری رسومات دیکھنے کو مجبور ہوئے۔

6. امت شاہ کے قافلے نے ’شَو یاترا‘ کو رخنہ انداز کر دیا، جس سے فیملی کی گاڑیاں باہر رہ گئیں۔ دروازہ بند کر دیا گیا اور فیملی کے اراکین کو ڈھونڈ کر واپس اندر لانا پڑا۔

7. آخری رسومات کے وقت رسمیں نبھانے والے پوتوں کو ’چِتا‘ تک پہنچنے کے لیے جگہ کے لیے جدوجہد کرنی پڑی۔

8. غیر ملکی سفیروں کو کہیں دوسری جگہ بٹھایا گیا اور وہ نظر نہیں آئے۔ حیرانی کی بات یہ رہی کہ جب بھوٹان کے بادشاہ کھڑے ہوئے تو وزیر اعظم کھڑے نہیں ہوئے۔

9. آخری رسومات والی مکمل جگہ کو اس خراب طریقے سے تیار کیا گیا تھا کہ ’شو یاترا‘ میں حصہ لینے والے کئی لوگوں کے لیے کوئی جگہ نہیں بچی۔

پون کھیڑا نے ڈاکٹر منموہن کی آخری رسومات میں مرکزی حکومت کے ذریعہ بدانتظامی کی مذکورہ بالا مثال پیش کرنے کے بعد لکھا کہ ’’اس عظیم سیاسی لیڈر (ڈاکٹر منموہن سنگھ) کے ساتھ کیے گئے اس نازیبا سلوک سے حکومت کی ترجیحات اور جمہوری اقدار کے تئیں اس کی بے حسی ظاہر ہوتی ہے۔ ڈاکٹر سنگھ وقار کے مستحق تھے، نہ کہ اس شرمناک نظارہ کے۔‘‘