کشمیر میں عیدالفطر کے روح پرور اجتماعات کے بعد جھڑپیں

سری نگر: وادی کشمیر میں بدھ کے روز عیدالفطر کی تقریب سعید انتہائی مذہبی جوش و خروش اور تزک و احتشام کے ساتھ منائی گئی۔ تاہم موصولہ اطلاعات کے مطابق نماز عیدین کے اجتماعات کے بعد قریب آدھ درجن مقامات پر آزادی کے حامی مظاہرین اور سیکورٹی فورسزکے درمیان پرتشدد جھڑپیں ہوئیں۔ ان جھڑپوں میں متعدد افراد بشمول سیکورٹی فورسز اہلکاروں کو معمولی نوعیت کی چوٹیں آئی ہیں۔

سری نگر کے پائین شہر کے نوہٹہ میں تاریخی و مرکزی جامع مسجد کے باہر عید کی نماز کی ادائیگی کے بعد آزادی کے حامی نوجوانوں نے سیکورٹی فورسز پر پتھراؤ کیا۔ سیکورٹی فورسز نے ردعمل میں آنسو گیس کے گولے داغے اور مبینہ طور پر چھرے والی بندوقوں کا استعمال کیا۔ سیکورٹی فورسز کی کارروائی میں کچھ احتجاجی نوجوان زخمی ہوئے ہیں۔

اننت ناگ اور کپواڑہ اضلاع میں بھی عیدالفطر کی نماز کے بعد احتجاجی نوجوانوں کی سیکورٹی فورسز کے ساتھ جھڑپیں ہوئیں۔ اگرچہ فورسز نے احتجاجیوں کو منتشر کرنے کے لئے آنسو گیس کا استعمال کیا تاہم کسی کے شدید طور پر زخمی ہونے کی کوئی اطلاع نہیں ہے۔

اس دوران وادی میں بدھ کو عیدالفطر کے پیش نظر ریل سروس معطل رہی۔ حریت کانفرنس (ع) کے چیئرمین اور متحدہ مجلس علماء جموں وکشمیر کے امیر میرواعظ مولوی عمر فاروق نے سری نگر کی تاریخی و مرکزی جامع مسجد میں اپنا معمول کا خطبہ دیا اور عید کی نماز ادا کی۔ انجمن اوقاف جامع مسجد سری نگر نے اعلان کر رکھا تھا کہ مسلسل موسلادھار بارشوں اور عیدگاہ میں نمی کے سبب عید الفطر کی نماز عیدگاہ سری نگر کے بجائے مرکزی جامع مسجد سری نگر میں ادا کی جائے گی۔

سرکاری ذرائع نے یو این آئی کو بتایا کہ چند ایک جگہوں کو چھوڑ کر بیشتر مقامات پر نماز عیدین کے اجتماعات پرامن طور پر اختتام کو پہنچے۔ موصولہ اطلاعات کے مطابق عیدالفطر یا چھوٹی عید کے اس سلسلے میں وادی کے طول وعرض کی مساجد، عیدگاہوں اور امام بارگاہوں میں عیدین کی دوگانہ نماز کے روح پرور اجتماعات منعقد ہوئے۔ عیدالفطر کے ان روح پرور اجتماعات میں وادی میں مکمل امن وامان کی بحالی، ترقی اور خوشحالی کے لئے خصوصی دعائیں مانگی گئیں۔

وادی کشمیر میں نماز عید کے سب سے بڑے اجتماعات تاریخی جامع مسجد اور شہر آفاق جھیل ڈل کے کناروں پر واقع درگاہ حضرت بل میں منعقد ہوئے جہاں لاکھوں کی تعداد میں لوگوں نے نماز عید ادا کی۔ وادی میں نماز عیدین کے اجتماعات میں خطباء وعلمائے کرام نے عید الفطر کی اہمیت، فضیلت اور فضائل بیان کرنے کے ساتھ ساتھ مسلمانوں کے درمیان اتحاد اور یکجہتی پر زور دیا۔

ریاستی گورنر ستیہ پال ملک نے لوگوں کو عید الفطر کی مبارکباد دی ہے۔ انہوں نے امید ظاہر کی کہ یہ مقدس تہوار ریاست میں امن، ترقی، خوشحالی اور خوشیوں کا نوید لیکر آئے گا۔ انہوں نے ریاست میں آپسی برادری، اخوت، محبت اور انسانیت کے بندھنوں کو مضبوط کرنے میں بھی عید الفطر کی خیر و برکت کی امید کی ہے۔

میرواعظ عمر فاروق نے عالم اسلام سمیت اہلیان کشمیر کو دل کی عمیق گہرائیوں کے ساتھ عید کی مبارکباد پیش کرتے ہوئے کہا ہے کہ دراصل عید الفطر اپنے اندر ایک ایسا حیات آفریں پیغام رکھتی ہے جس سے عالم انسانیت کی بہار وابستہ ہے اور فی الحقیقت عید کے مبارکباد کے وہی لوگ مستحق ہیں جنہوں نے ماہ رمضان اور ماہ قرآن کا کما حقہ حق ادا کرنے کی کوشش کی ہے۔