شہریت قانون کے خلاف جامعہ کے طلبا کی سلسلہ وار بھوک ہڑتال شروع

شہریت ترمیمی قانون یعنی سی اے اے کے خلاف مظاہرہ کر رہے جامعہ کے طالبات نے بدھ کو سلسلہ وار بھوک ہڑتال شروع کر دی ہے۔ طلبا نے حکومت کے سامنے شہریت ترمیمی قانون واپس لینے سمیت سات مطالبات رکھے ہیں۔ یونیورسٹی احاطہ کے باہر احتجاجی مظاہرہ کے مقام پر موجود طلبا و طالبات کے مطابق وہ سلسلہ وار بھوک ہڑتال کر رہے ہیں تاکہ ان کی بات حکومت تک پہنچے۔ واضح رہے کہ جامعہ ملیہ اسلامیہ یونیورسٹی کے طلبا کے احتجاجی مظاہرہ کا بدھ کو 20واں دن تھا۔

جامعہ ملیہ یونیورسٹی طلبا تحریک کمیٹی سے جڑے آفتاب کے مطابق طلبا اب لگاتار سلسلہ وار بھوک ہڑتال پر بیٹھیں گے اور ہی بھوک ہڑتال مطالبات پورے ہونے تک جاری رہے گی۔ جامعہ طلبا کا سب سے پہل ااور بڑا مطالبہ شہریت قانون، این آر سی اور این پی آر کو واپس لینے کا ہے۔

بھوک ہڑتال پر بیٹھے طالبات کی دیگر مطالبات میں ملک بھر میں احتجاجی مظاہرہ کے دوران ہوئی اموات کی غیر جانبدارانہ جانچ کرانے، پولس حراست میں لیے گئے مظاہرین (جو تشدد میں شامل نہیں تھے) کو آزاد کرنے، پرامن مظاہروں میں شامل رہے لوگوں کے خلاف ہوئی ایف آئی آر واپس لینے، تشدد کے شکار مظاہرین کو معاوضہ دینے، انٹرنیٹ خدمات بحال کرنے جیسے مطالبات شامل ہیں۔

اس درمیان بدھ کو بہار کے سابق رکن پارلیمنٹ پپو یادو بھی شہریت ترمیمی قانون کے خلاف جامعہ پہنچے۔ انھوں نے کہا کہ وہ نئے سال کی مبارکباد نہیں دیں گے کیونکہ یہ انگریزی کا نیا سال انگریزوں کی علامت ہے۔ انھوں نے مظاہرے کے مقام پر موجود خواتین اور جامعہ کی لڑکیوں کو مخاطب کرتے ہوئے کہا کہ ’’اس تحریک میں خواتین کے کردار کو دیکھتے ہوئے یہ ضرورت محسوس ہوتی ہے کہ ملک کو بیٹیوں کے ہاتھوں میں سونپ دینا چاہیے۔ ملک کی ثقافت، آئین، شناخت کی حفاظت کی ذمہ داری خواتین کامیابی کے ساتھ اٹھائیں گی۔‘‘