بچوں کا فن اور کمپیوٹر انقلاب ہماری طاقت، راجیو گاندھی کی بصیرت نے نئی راہیں دکھائیں: دیویندر یادو

نئی دہلی؛ دہلی پردیش کانگریس کمیٹی کے صدر دیویندر یادو نے موتی نگر اسمبلی حلقہ کے چونا بھٹّی، کیرتی نگر واقع نرنکاری بھون میں منعقدہ ڈرائنگ مقابلے میں بطور مہمانِ خصوصی شرکت کی اور بچوں کی تخلیقی صلاحیتوں کی بھرپور حوصلہ افزائی کی۔ مقابلے کا موضوع ’’’کمپیوٹر کی اہمیت اور زندگی میں اس کے مختلف استعمال‘ تھا، جسے شرکاء نے اپنے فن اور خیالات کے امتزاج سے عمدہ طور پر پیش کیا۔

دیویندر یادو نے سابق کانگریس امیدوار رمیش پوپلی کے ذریعے منعقد اس پروگرام کو کامیاب بنانے پر مبارکباد دی اور کہا کہ بڑی تعداد میں بچوں نے حصہ لے کر ثابت کیا کہ نئی نسل میں زبردست تخلیقی صلاحیت موجود ہے۔ انہوں نے کہا، ’’بچوں کا فن اور کمپیوٹر انقلاب ہماری طاقت ہیں، راجیو گاندھی کی بصیرت نے نئی راہیں دکھائیں۔‘‘

اس موقع پر ضلع صدر مدن کھوروال، سدھارتھ راؤ، رمیش پوپلی، مبصر گوری شنکر شرما، ہرنام سنگھ، سشما یادو اور راجندر سنگھ نام دھاری سمیت کئی کانگریسی رہنما موجود تھے۔

یادو نے کہا کہ آج کے دور میں جب مصنوعی ذہانت (اے آئی) زندگی کا حصہ بنتی جا رہی ہے، کمپیوٹر کی اہمیت مزید بڑھ گئی ہے۔ انہوں نے راجیو گاندھی کو ملک میں کمپیوٹر انقلاب کا معمار قرار دیتے ہوئے کہا کہ ان کی دوراندیشی نے نوجوانوں کو نئی سمت دی اور آج راہل گاندھی انہی نقشِ قدم پر چلتے ہوئے عوامی مسائل کے حل اور ترقی کے لیے کوشاں ہیں۔

انہوں نے یاد دلایا کہ یہی چونا بھٹّی وہ جگہ ہے جہاں راہل گاندھی خود آ کر بڑھئی کے ساتھ کرسی بنانے میں شریک ہوئے تھے اور عوام کے مسائل کو قریب سے سمجھا تھا۔

انہوں نے کانگریس کے تنظیمی ڈھانچے پر بات کرتے ہوئے بتایا کہ، ’’دہلی میں ’جن سنگٹھن‘ مہم کے تحت ضلع، بلاک، زون اور سیکٹر سطح پر تنظیم سازی مکمل کر لی گئی ہے۔ 14 اضلاع میں بلاک و زونل عہدیداروں کی تربیتی ورکشاپ بھی ہو چکی ہیں۔ ان کے مطابق پچھلے چھ ماہ میں بی جے پی حکومت نے محض کھوکھلے وعدے کیے، جبکہ کانگریس نے عوامی مسائل اجاگر کرنے کے ساتھ اپنی تنظیم کو نچلی سطح تک مضبوط بنایا۔

دیویندر یادو نے کہا کہ کانگریس عوام کے مسائل حل کرنے، نئی نسل کو مواقع فراہم کرنے اور ملک کو جدید سمت دینے کے لیے پرعزم ہے۔