فوج کی شمالی کمان کے سربراہ کا اکھنور دورہ، جوانوں کی خدمات کو سراہا

شمالی کمان کے آرمی کمانڈر لیفٹیننٹ جنرل پراتیک شرما نے اتوار کے روز اکھنور میں تعینات یونٹس کا دورہ کر کے جوانوں کے حوصلے اور ان کی پیشہ ورانہ کارکردگی پر اطمینان کا اظہار کیا۔

جموں نشین دفاعی ترجمان کے مطابق، لیفٹیننٹ جنرل پراتیک شرما نے سیلاب کے دوران انسانی بنیادوں پر کی جانے والی بروقت اور کامیاب کارروائیوں کو سراہتے ہوئے جوانوں کی ثابت قدمی اور لگن کی تعریف کی۔ انہوں نے کہا کہ جموں میں حالیہ تباہ کن سیلاب کے دوران فوجی اہلکاروں نے جانفشانی سے عوام کی جان و مال کو محفوظ بنایا اور ہر ممکن مدد فراہم کی۔

انہوں نے اپنے خطاب میں کہا کہ فوج کے تمام رینکس نے مشکل حالات میں جس طرح بلند حوصلے اور آپریشنل تیاری کا مظاہرہ کیا ہے، وہ واقعی لائقِ تحسین ہے۔ انہوں نے مزید کہا کہ امن قائم رکھنے کے ساتھ ساتھ ہمہ وقت چوکس رہنا وقت کی اہم ضرورت ہے تاکہ کسی بھی ہنگامی صورتحال سے موثر طور پر نمٹا جا سکے۔

آرمی کمانڈر نے افسران اور جوانوں پر زور دیا کہ وہ اسی جذبے اور لگن کے ساتھ اپنی ذمہ داریاں انجام دیتے رہیں تاکہ سرحدی علاقوں کے عوام کو مکمل تحفظ اور اعتماد فراہم کیا جا سکے۔ادھر مقامی لوگوں نے بھی فوج کے کردار کو سراہتے ہوئے کہا کہ مشکل وقت میں آرمی نے ہمیشہ عوام کا ساتھ دیا ہے اور ان کے مسائل کے حل میں بھرپور تعاون فراہم کیا ہے۔