چھتیس گڑھ: ایک کروڑ کے انعامی منوج سمیت 10 نکسلی ہلاک

رائے پور: چھتیس گڑھ میں نکسلیوں کے خلاف جاری مہم کے دوران جمعرات کو سی آر پی ایف کی کوبرا کمانڈو، چھتیس گڑھ پولیس اور ڈسٹرکٹ ریزرو گارڈ (ڈی آر جی) کی مشترکہ کارروائی میں ایک کروڑ روپے کے انعامی نکسلی سی سی ایم موڈیم بالکرشنا عرف منوج سمیت 10 نکسلی مارے گئے۔

یہ آپریشن ریاست کے نکسل متاثرہ علاقے میں گزشتہ کئی دنوں سے جاری تھا۔ سکیورٹی فورسز نے اپنی حکمت عملی اور باہمی تعاون سے اس آپریشن کو انجام دیا۔ مارا گیا منوج نکسلی تنظیم کا ایک انتہائی اہم رکن تھا اور طویل عرصے سے سکیورٹی ایجنسیوں کے لیے چیلنج بنا ہوا تھا۔ اس کے سر پر حکومت نے ایک کروڑ روپے کا انعام رکھا تھا۔ منوج کی ہلاکت کو نکسلی نیٹ ورک کے لیے زبردست دھچکا قرار دیا جا رہا ہے۔

اس آپریشن میں دیگر کئی خطرناک نکسلی بھی مارے گئے، جو مختلف وارداتوں میں ملوث تھے۔ حکام کے مطابق یہ کارروائی نکسلی تنظیموں کے لیے پیغام ہے کہ ان کی سرگرمیوں کو کسی بھی صورت برداشت نہیں کیا جائے گا۔ مرکزی وزیر داخلہ امیت شاہ نے اس بڑی کامیابی پر اپنے ردعمل میں سکیورٹی فورسز کو مبارکباد دی۔

انہوں نے سوشل میڈیا پلیٹ فارم 'ایکس' پر لکھا، ’’نکسلیوں کے خلاف ہماری سکیورٹی فورسز نے ایک اور بڑی کامیابی حاصل کی ہے۔ چھتیس گڑھ میں سی آر پی ایف کی کوبرا کمانڈو، پولیس اور ڈی آر جی نے مشترکہ آپریشن میں ایک کروڑ کے انعامی سی سی ایم منوج سمیت 10 نکسلیوں کو ہلاک کر دیا ہے۔ باقی بچے نکسلی بھی جلد ہتھیار ڈال دیں، کیونکہ 31 مارچ سے پہلے ملک سے سرخ دہشت کا خاتمہ یقینی ہے۔‘‘

رائے پور کے انسپکٹر جنرل (آئی جی) نے اس بات کی تصدیق کی کہ ضلع گڑیا بند کے جنگلات میں جوانوں اور نکسلیوں کے درمیان شدید مڈبھیڑ ہوئی۔ فورسز نے پورے علاقے کو گھیر کر نکسلیوں کو پسپا کیا۔ انہوں نے مزید بتایا کہ آپریشن ابھی جاری ہے اور پورے علاقے میں سرچنگ کی جا رہی ہے تاکہ فرار شدہ نکسلیوں کو بھی پکڑا جا سکے۔