سی بی ایس ای: دسویں کے دوسرے بورڈ امتحانات 15 مئی سے، طلبہ کو کارکردگی بہتر بنانے کا ایک اور موقع

مرکزی ثانوی تعلیمی بورڈ (سی سی ایس ای) نے دسویں جماعت کے دوسری مرتبہ منعقد ہونے جا رہے بورڈ امتحانات کے لیے تاریخوں کا اعلان کر دیا ہے، جن کا آغاز 15 مئی 2026 سے ہوگا۔ یہ امتحانات 21 مئی تک جاری رہیں گے اور ان کا مقصد طلبہ کو اپنے حاصل کردہ نمبروں میں بہتری کا ایک اور موقع فراہم کرنا ہے۔ نئی تعلیمی پالیسی کے تحت سال 2026 سے دسویں جماعت کے بورڈ امتحانات سال میں دو بار منعقد کیے جا رہے ہیں، تاہم دوسری بار امتحان دینا لازمی نہیں بلکہ یہ مکمل طور پر اختیاری ہے۔

بورڈ کی جانب سے جاری کردہ شیڈول کے مطابق زیادہ تر امتحانات صبح 10 بج کر 30 منٹ سے دوپہر 1 بج کر 30 منٹ تک ہوں گے، جبکہ کچھ مضامین کے پرچے دوپہر 12 بج کر 30 منٹ پر ختم ہو جائیں گے۔ امتحانات کا آغاز 15 مئی کو ریاضی کے پرچے سے ہوگا، جس میں اسٹینڈرڈ اور بیسک دونوں سطحیں شامل ہوں گی۔ اس کے بعد 16 مئی کو انگریزی کا پرچہ ہوگا، جس میں کمیونی کیٹو اور لینگویج اینڈ لٹریچر دونوں شامل ہیں۔

18 مئی کو سائنس کا امتحان لیا جائے گا، جبکہ 19 مئی کو مختلف زبانوں کے پرچے منعقد ہوں گے، جن میں ہندی، اردو، پنجابی، بنگالی، تمل، تلگو، مراٹھی، گجراتی، ملیالم اور آسامی شامل ہیں۔ 20 مئی کو پینٹنگ، سنسکرت، انفارمیشن ٹیکنالوجی اور مصنوعی ذہانت جیسے مضامین کے امتحانات ہوں گے۔ امتحانات کا اختتام 21 مئی کو سماجی سائنس کے پرچے کے ساتھ ہوگا۔

یہ نظام طلبہ کو ایک ہی تعلیمی سال میں اپنی کارکردگی کو بہتر کرنے کا موقع دیتا ہے، خاص طور پر ان طلبہ کے لیے جو پہلے امتحان کے نتائج سے مطمئن نہیں ہوتے۔ بورڈ نے طلبہ کو ہدایت دی ہے کہ وہ امتحان سے قبل اپنی تیاری مکمل رکھیں، وقت سے پہلے امتحانی مرکز پہنچیں اور اپنا ایڈمٹ کارڈ ساتھ لانا نہ بھولیں۔

اعداد و شمار کے مطابق حال ہی میں جاری ہونے والے پہلے امتحانات کے نتائج میں 95 فیصد یا اس سے زیادہ نمبر حاصل کرنے والے طلبہ کی تعداد 55368 رہی، جو کل طلبہ کا تقریباً 2.24 فیصد بنتی ہے۔ اسی طرح 221574 طلبہ نے 90 فیصد یا اس سے زیادہ نمبر حاصل کیے، جو مجموعی کامیاب طلبہ کا تقریباً 8.96 فیصد ہے۔ مجموعی طور پر 2483479 طلبہ نے رجسٹریشن کرایا تھا، جن میں سے 2471777 امتحان میں شریک ہوئے اور 2316008 طلبہ کامیاب قرار پائے۔ اس سال مجموعی کامیابی کی شرح 93.70 فیصد رہی، جو گزشتہ سال کے مقابلے میں معمولی اضافہ ظاہر کرتی ہے۔