خلا میں تاریخ رقم کرنے کو تیار کیپٹن شبھانشو شکلا، مئی میں آئی ایس ایس کے لیے بھریں گے اُڑان

ہندوستانی فضائیہ کے گروپ کیپٹن شبھانشو شکلا، بین الاقوامی خلائی اسٹیشن (آئی ایس ایس) پر جانے والے پہلے ہندوستانی خلا باز بننے والے ہیں۔ وہ مئی 2025 میں اپنی اڑان بھریں گے۔ یہ سفر اکسیم مشن 4- (Ax-4) کے تحت ہوگی جس میں شبھانشو شکلا اکسیم اسپیس کے ذریعہ منعقد ایک خلائی مشن کے رکن ہوں گے۔

اکسیم مشن-4 میں ہندوستان، پولینڈ، ہنگری اور امریکہ کے خلائی مسافر شامل ہوں گے۔ اس مشن کے تحت شبھانشو شکلا بطور مشن پائلٹ خلا میں جائیں گے۔ ان کے ساتھ پولینڈ کے سلاووز اُجنانسکی اور ہنگری کے تبور کاپو مشن اسپیشلسٹ کے طور پر شامل رہیں گے۔ امریکی خلائی مسافر وٹسن اس مشن کی کمانڈر ہوں گی۔ یہ مشن 14 دنوں تک چلے گا جس میں سائنسی تحقیق اور تکنیکی ٹیسٹ کیے جائیں گے۔

شبھانشو شکلا اور ان کے ساتھی خلا باز اسپیس ایکس کے ڈریگن کیپسول سے بین الاقوامی خلائی اسٹیشن کے لیے اُڑان بھریں گے۔ یہ لانچ امریکہ کے فلوریڈا واقع ’ناسا‘ کے کینیڈی اسپیس سینٹر کے فالکن-9 کے ذریعہ کیا جائے گا۔ لانچ کی صحیح تاریخ ’ناسا‘ اور اکشیم اسپیس کے ذریعہ حتمی منظوری کے بعد اعلان کی جائے گی۔

Ax-4 مشن کا خاص مقصد خلا میں مختلف سائنسی تجربات اور تکنیکی ٹیسٹ کرنا ہے۔ اس مشن میں کئی بڑے کام کیے جائیں گے۔ وہاں سبھی سائنسداں مائیکرو گریویٹی میں حیاتیات اور طبیعیات سے جڑے تجربے کریں گے۔ اس کے ساتھ ہی وہاں تکنیکی ٹیسٹ بھی کیے جائیں گے۔ اس دوران نئی خلائی تکنیکوں اور آلات کا ٹیسٹ ہوگا۔ اس مشن کے تحت زمین پر لوگوں کو خلائی سائنس اور ریسرچ کے تئیں بیدار کیا جائے گا۔

شبھانشو شکلا کا یہ مشن ہندوستان کی خلائی تحقیقات کے لیے ایک بڑی چھلانگ ثابت ہونے والا ہے۔ 40 سال کے بعد ایک ہندوستانی خلا میں جا رہا ہے۔ جس سے نہ صرف ملک کی سائنسی ساکھ بڑھے گی بلکہ مستقبل میں گگن یان مشن اور دیگر خلائی مہمات کے لیے نئے امکانات بھی کھلیں گے۔ اس مشن سے ہندوستان کو عالمی خلائی تحقیق اور کمرشیل خلائی سفر میں اہم کردار ادا کرنے کا موقع ملے گا۔