'مداری' اور 'درشیم' جیسی فلموں کے ڈائریکٹر نشی کانت کامت نے بھی دنیا کو کہا الوداع

بالی ووڈ سے ایک بار پھر بری خبر سامنے آ رہی ہے۔ 'مداری' اور 'درشیم' جیسی فلموں کے ڈائریکٹر نشی کانت کامت نے اس دنیا کو الوداع کہہ دیا ہے۔ لیور کے عارضہ میں مبتلا کامت گزشتہ کئی دنوں سے اسپتال میں داخل تھے اور بعد دوپہر ان کے انتقال کی خبر سامنے آئی۔ بالی ووڈ اداکار رتیش دیشمکھ نے ٹوئٹ کر کے یہ جانکاری دی۔ انھوں نے لکھا کہ "میں تمھیں بہت یاد کروں گا میرے دوست۔ نشی کانت کامت کی روح کو سکون ملے۔"

قابل ذکر ہے کہ نشی کانت کامت کی خراب صحت کے بارے میں اسپتال نے ہیلتھ بلیٹن جاری کیا تھا جس میں کہا تھا کہ "ان کی (نشی کانت کامت کی) حالت سنگین بنی ہوئی ہے اور وہ لائف سپورٹ سسٹم پر تھے۔ گزشتہ کئی دن سے وہ اسپتال میں داخل ہیں اور ان کی طبیعت لگاتار سنگین بنی ہوئی ہے۔ نشی کانت کامت لیور سیروسس نامی بیماری میں مبتلا ہیں۔ اسی بیماری کے سبب وہ گزشتہ کئی دنوں سے اسپتال میں داخل تھے۔"

اس سے قبل ایک بیان میں اسپتال نے کہا تھا کہ "نشی کانت کامت (50 سال، مرد) کو 31 جولائی کو پیلیا اور پیٹ میں درد کی شکایت کے سبب حیدر آباد میں گچی باؤلی واقع اے آئی جی میں داخل کرایا گیا تھا جہاں ان میں کرونک لیور ڈیزیز اور دیگر انفیکشن کا پتہ چلا۔"

واضح رہے کہ نشی کانت کامت نے اجے دیوگن اور تبو اسٹارر 'درشیم' اور عرفان خان اسٹارر 'مداری' جیسی فلموں کی ہدایت کاری کی۔ اس کے علاوہ انھوں نے جان ابراہم کے ساتھ 'فورس' اور 'راکی ہینڈسم' جیسی فلمیں بنائی۔ نشی کانت کامت کی پیدائش مہاراشٹر میں ہوئی تھی۔ انھوں نے سال 2005 میں مراٹھی فلم 'ڈومبی ولی فاسٹ' سے ڈائریکشن میں ڈیبو کیا تھا۔ ان کی پہلی ہی فلم کو مراٹھی بیسٹ فیچر فلم کا نیشنل ایوارڈ بھی ملا تھا۔ یہ فلم اس سال کی سب سے بڑی ہٹ مراٹھی فلموں میں سے ایک تھی۔