بی جے پی اقتدار کے لئے کچھ بھی کرنے کو تیار: اکھلیش

لکھنؤ: مہاراشٹر کی موجودہ سیاسی حالات کا ذکر کیے بغیر سماج وادی پارٹی (ایس پی) سربراہ اکھلیش یادو نے کہا ہے کہ بھارتیہ جنتا پارٹی (بی جے پی) کچھ بھی کرنے کو تیار رہتی ہے۔

اکھلیش یادو نے کہا کہ ’’بڑی قربانیوں سے ملی آزادی کو بے مقصد بنانے کی سازش میں بی جے پی مشغول ہے۔ آزادی کی تحریک کے ساتھ جو اقدار قائم کیے گئے تھے ان کو ’’ تلانجلی‘‘ دی جا رہی ہے۔ انہوں نے کہا کہ اترپردیش میں بی جے پی حکومت میں گھپلوں کی ایک کے بعد ایک کڑی کھل رہی ہے۔ ہزاروں بجلی ملازمین کے پی ایف فنڈ کے گھوٹالے کی جانچ میں روز نئے حقائق سامنے آرہے ہیں۔

68500 اسسٹنٹ ٹیچروں کی تقرری میں اور گرام پنچایتوں کی پرفارمنس گرانٹ دستیاب کرانے میں بڑے پیمانے پر دھاندھلی کے علاوہ ہوم گارڈ کی تنخواہ گھپلے کے ساتھ ایس پی میں سپاہی بھرتی امتحان میں میڈیکل ٹیسٹ میں بھی گڑبڑی کی شکایتیں سامنے آچکی ہیں۔ جن پر جانچ کے اعلان ہوئے ہیں۔ لوک سبھا میں بتایا گیا کہ یو پی میں 31 اکتوبر 2019 تک کھاد تقسیم کے نظام میں بدعنوانی کے 328 معاملے میں سامنے آچکے ہیں۔

سابق وزیر اعلی اکھلیش سنگھ یادو نے کہا کہ حد تو یہ ہے کہ ڈھائی سال سے زیادہ کا وقت گزر جانے کے بعد بھی بی جے پی حکومت ریاست میں ترقی کی ایک اینٹ نہیں رکھ سکی ہے۔ گڈھے سے پاک سڑکوں کا بڑا دعوی جھوٹا ثابت ہوچکا ہے۔ بجلی پیداوار میں بی جے پی ایک یونٹ کا بھی دعوی نہیں کرسکتی ہے۔ غریب ایس سی/ایس ٹی طلبا کو پڑھائی سے محروم کرنے کے لئے تعلیمی اداروں میں ان کے مفت داخلے کا پرانے نظام کو ختم کردیا گیا ہے۔ دوا، پڑھائی دونوں مہنگی ہو رہی ہے۔ نوجوانوں نسل کا مستقبل تاریک ہے۔